ماجىلىستە سپورت دارىگەرلەرىنىڭ جەتىسپەۋشىلىگى ماسەلەسى كوتەرىلدى

استانا. قازاقپارات - پارلامەنت ءماجىلىسىنىڭ جالپى وتىرىسىندا سپورت دارىگەرلەرىنىڭ تاپشىلىعى ماسەلەسى كوتەرىلدى، دەپ حابارلايدى قازاقپارات ءتىلشىسى.

«دەنساۋلىق ساقتاۋ مينيسترلىگىنىڭ مالىمەتىنشە، سپورت تۇرلەرى بويىنشا ۇلتتىق قۇراما كوماندالاردا سپورتتىق دارىگەرلەردىڭ تاپشىلىعى 11 ادامدى قۇرادى، ال پاراسپورتتىڭ قۇراما كوماندالارىندا 15 ادام جەتىسپەيدى. وسىعان بايلانىستى بۇل پروبلەمانى جۇيەلى تۇردە قالاي شەشپەكسىزدەر؟ ويتكەنى زاماناۋي سپورتتىق مەديتسينا سالاسى مەديتسينا عىلىمىنىڭ بولەك باعىتى بولىپ وتىر»، - دەدى دەپۋتات قۇرالاي قاراكەن.

ق ر مادەنيەت جانە سپورت ءمينيسترى ارىستانبەك مۇحامەدي ۇلىنىڭ سوزىنە قاراعاندا، بۇل ماسەلە 2016 -جىلدان بەرى تالقىلاندى.

«2017 -جىلى سپورت دارىگەرلەرىن دايارلاۋ ءۇشىن ماگيستراتۋرا، باكالاۆريات جانە Phd دوكتورانتۋرا سالاسىندا ارنايى گرانت ءبولىندى. قازىرگى كەزدە الدىڭعى قاتارلى مەديتسينالىق جوو- لاردا سپورتتىق دارىگەرلەر دايىندالۋدا. وسى ورايدا دارىگەرلەر جەتىسپەۋشىلىگىن دەنساۋلىق ساقتاۋ مينيسترلىگىمەن بىرلەسە شەشىپ جاتىرمىز»، - دەدى ا. مۇحامەدي ۇلى.

ءوز كەزەگىندە دەنساۋلىق ساقتاۋ ۆيتسە- ءمينيسترى ءلاززات اقتايەۆا سپورت دارىگەرلەرىن ەلىمىزدىڭ ءۇش وقۋ ورنى دايىنداپ جاتقانىن اتاپ ءوتتى.

«2016 -جىلدان بەرى 16 ادامدى دايىندادىق. بيىل 19 رەزيدەنت تۇلەك بولادى. 2020 -جىلى تاعى 26 ادام بۇل سالاعا كەلەدى. سايكەسىنشە، جوعارىدا اتالعان تاپشىلىق ماسەلەسى شەشىلەدى. تاپسىرىس كولەمى دەنە شىنىقتىرۋ جانە سپورت ۇيىمدارى ءوتىنىمى نەگىزىندە قالىپتاسادى. بيىلعى مامىرعا دەيىن ءبىز كەلەسى وقۋ جىلىنا تاپسىرىستى قالىپتاستىرامىز»، - دەدى ول.