قازاقستان كوپ ۆەكتورلى، بەيبىتسۇيگىش سىرتقى ساياسي باعىتىن ساقتايدى - ق ر سءى م

 استانا. قازاقپارات - قازاقستان كوپ ۆەكتورلى، بەيبىتسۇيگىش سىرتقى ساياسي باعىتىن ساقتايدى. بۇل تۋرالى قازاقستان رەسپۋبليكاسى سىرتقى ىستەر مينيسترلىگىنىڭ بۇگىنگى مالىمدەمەسىندە ايتىلعان، دەپ حابارلايدى قازاقپارات.

2019 -جىلعى 19- ناۋرىزدا قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ مەملەكەت باسشىسىنىڭ وكىلەتتىگىن توقتاتۋ تۋرالى حالىققا تاريحي ۇندەۋ جاساپ، ءتيىستى جارلىققا قول قويدى.

20 - ناۋرىزدا قازاقستان رەسپۋبليكاسىنىڭ كونستيتۋتسياسىنا سايكەس پرەزيدەنت وكىلەتتىلىگى پارلامەنت سەناتىنىڭ ءتوراعاسى قاسىم- جومارت توقايەۆقا ءوتتى. قازاقستان رەسپۋبليكاسىنىڭ تۇڭعىش پرەزيدەنتى ن. نازاربايەۆ قاۋىپسىزدىك كەڭەسىنىڭ ءتوراعاسى، قازاقستان حالقى اسسامبلەياسىنىڭ ءتوراعاسى «نۇر وتان» پارتياسىنىڭ ءتوراعاسى جانە كونستيتۋتسيالىق كەڭەستىڭ مۇشەسى بولىپ قالادى.

قازاقستاننىڭ قازىرگى زامانعى ساياسي جۇيەسى بيلىكتىڭ، مەملەكەتتىڭ ساياسي جانە ەكونوميكالىق دامۋىنىڭ تولىق ساباقتاستىعىن قامتاماسىز ەتەدى. ءبىرىنشى كەزەكتە ازاماتتاردىڭ ءال- اۋقاتى مەن ءومىر ءسۇرۋ ساپاسىن ارتتىرۋعا، زاڭنىڭ ۇستەمدىگى مەن دامۋىنىڭ دەموكراتيالىق مودەلى نەگىزىندە ازاماتتىق قوعام ينستيتۋتتارىن كۇشەيتۋگە باعىتتالعان تىنىس- تىرشىلىكتىڭ بارلىق سالالارىن جاڭعىرتۋ جالعاستىرىلاتىن بولادى. مەملەكەت قازاقستانداعى ينۆەستيتسيالىق احۋالدى جاقسارتۋ جونىندەگى، ونىڭ ىشىندە شەتەلدىك بيزنەس ارىپتەستەردىڭ قۇقىقتارى مەن مۇددەلەرىن قورعاۋ جونىندەگى شارالاردى جالعاستىرادى.

تۇڭعىش پرەزيدەنت قازاقستان رەسپۋبليكاسىنىڭ 2050 -جىلعا دەيىنگى دامۋ ستراتەگياسىندا ەلدىڭ ودان ءارى ىلگەرىلەۋىنىڭ كوكجيەگى مەن پارامەترلەرىن ايقىندادى. ماقساتى - الەمنىڭ ەڭ دامىعان 30 مەملەكەتىنىڭ قاتارىنا كىرۋ.

ستراتەگيالىق كوزقاراس ن. نازاربايەۆ الەمدىك ارەناداعى ەلىمىزدىڭ قازىرگى كەلبەتىن ايقىنداپ، قازاقستاننىڭ حالىقارالىق قاتىناستار جۇيەسىندەگى بىرەگەي سۋبەكتىلىگىن بەكىتتى.

ن. نازاربايەۆتىڭ ىسكە اسىرىلعان اۋقىمدى مىندەتتەر مەن جاسامپاز حالىقارالىق باستامالارى مەملەكەتتىڭ ەگەمەندىگى مەن اۋماقتىق تۇتاستىعىنىڭ بەرىك كەپىلى، ءبىزدىڭ قوعامنىڭ ۇزاق مەرزىمدى تاريحي پەرسپەكتيۆاعا قاۋىپسىز جانە تۇراقتى دامۋى ءۇشىن نەگىز بولدى.

قازاقستاننىڭ تۇڭعىش پرەزيدەنتى جاھاندىق يادرولىق قارۋعا قارسى قوزعالىستىڭ، ەۋرازياداعى ينتەگراتسيالىق پروتسەستەردىڭ تانىمال كوشباسشىسى بولىپ تابىلادى. ونىڭ باستاماسى بويىنشا قازىرگى زامانعى حالىقارالىق قاتىناستارداعى سەنىم احۋالىن قالپىنا كەلتىرۋگە باعىتتالعان بىرەگەي ديالوگ الاڭدارى - ازياداعى ءوزارا ءىس- قيمىل جانە سەنىم شارالارى كەڭەسى، الەمدىك جانە ءداستۇرلى دىندەر كوشباسشىلارىنىڭ سەزى جانە ت. ب. قۇرىلدى.

قازاقستان بارلىق حالىقارالىق مىندەتتەمەلەردى ساقتاي وتىرىپ، كوپ ۆەكتورلى، تەڭگەرىمدىلىك جانە پراگماتيزم قاعيداتتارىنا نەگىزدەلگەن بەيبىتسۇيگىش سىرتقى ساياسي باعىتتى ساقتايدى. الەمدىك قوعامداستىقتىڭ بارلىق ەلدەرىمەن قارىم- قاتىناس ءوزارا سىيلاستىق، تەڭ قۇقىلىق جانە ءبىر- ءبىرىنىڭ مۇددەلەرىن ەسەپكە الۋ نەگىزىندە قۇرىلادى.

قازاقستان رەسپۋبليكاسىنىڭ جاڭا پرەزيدەنتى ءوز قىزمەتىن قازاقستان رەسپۋبليكاسىنىڭ كونستيتۋتسياسىنا جانە باسقا دا زاڭدارىنا سايكەس قۇراتىن بولادى.