قاسىم- جومارت توقايەۆتىڭ قازاقستان حالقىنا انت بەرۋ ءراسىمى قالاي ءوتىپ جاتىر

None
None
استانا. قازاقپارات - رەسپۋبليكا پرەزيدەنتى وكىلەتتىگىن ۋاقىتشا اتقاراتىن قاسىم- جومارت توقايەۆتىڭ قازاقستان حالقىنا انت بەرۋ ءراسىمى ءوتىپ جاتىر، دەپ حابارلايدى قازاقپارات ءتىلشىسى.

الدىمەن ق ر پارلامەنتى ءماجىلىسىنىڭ ءتوراعاسى نۇرلان نىعماتۋللين ق. توقايەۆتىڭ رەسپۋبليكا پرەزيدەنتى وكىلەتتىگىن ۋاقىتشا اتقارۋعا كىرىسۋىنە ارنالعان شارانىڭ اشىق ەكەندىگىن جاريا ەتتى. وسىدان كەيىن بىرلەسكەن وتىرىسى ءوتىپ جاتقان زالعا قۇرمەتتى قاراۋىل ەلىمىزدىڭ تۋىن، كونستيتۋتسياسىن اكەلدى. كەلەسى كەزەكتە ەلىمىزدىڭ تۇڭعىش پرەزيدەنتى - ەلباسى نۇرسۇلتان نازاربايەۆ بارشا دەپۋتاتتاردىڭ قوشەمەتىمەن زالعا كىرىپ، جوعارى ورىنعا وتىردى. وسىدان كەيىن قاسىم- جومارت توقايەۆ زالعا كىرگەن انت قابىلدايتىن تۇعىرعا كوتەرىلدى.

 مۇنان سوڭ ءماجىلىس ءتوراعاسى نۇرلان نىعماتۋلين ق ر كونستيتۋتسيالىق كەڭەسىنىڭ ءتوراعاسى قايرات ماميگە ءسوز بەردى.

 «قۇرمەتتى دەپۋتاتتار، مەن شاقىرىلعاندار! تاۋەلسىز قازاقستاننىڭ نەگىزىن قالاۋشى قازاقستان رەسپۋبليكاسىنىڭ تۇڭعىش پرەزيدەنتى ەلباسى نۇرسۇلتان نازاربايەۆ ءوزىنىڭ كونستيتۋتسيالىق قۇقىعىن جانە دە تاريحي ميسسياسىن تولىقتاي ىسكە اسىرىپ، قازاقستان پرەزيدەنتى وكىلەتتىگىن ءوز ەركىمەن توقتاتتى. مۇنداي جاعدايدا ق ر كونستيتۋتسياسىنىڭ 48-بابى 1 - تارماعىنا سايكەس ق ر پرەزيدەنتىنىڭ وكىلەتتىگى قالعان مەرزىمگە سەنات ءتوراعاسى قاسىم- جومارت كەمەل ۇلى توقايەۆقا كوشەدى. ق ر كونستيتۋتسياسىنىڭ 42-بابىنا سايكەس ق ر پرەزيدەنتى قازاقستان حالقىنا انت بەرگەن ساتتەن باستاپ قىزمەتىنە كىرەسەدى»، - دەپ اتاپ ءوتتى ول.

وسىدان كەيىن قاسىم- جومارت توقايەۆ وڭ قولىن ەلىمىزدىڭ اتا زاڭىنا قويىپ تۇرىپ: «قازاقستان حالقىنا ادال قىزمەت ەتۋگە، قازاقستان رەسپۋبليكاسىنىڭ كونستيتۋتسياسى مەن زاڭدارىن قاتاڭ ساقتاۋعا، ازاماتتاردىڭ قۇقىقتارى مەن بوستاندىقتارىنا كەپىلدىك بەرۋگە، قازاقستان رەسپۋبليكاسى پرەزيدەنتىنىڭ وزىمە جۇكتەلگەن مارتەبەلى مىندەتىن ادال اتقارۋعا سالتاناتتى تۇردە انت ەتەمىن»، - دەدى.

كەلەسى كەزەكتە ءماجىلىس ءتوراعاسى ق ر ورتالىق سايلاۋ كوميسسياسىنىڭ ءتوراعاسى بەرىك يماشيەۆقا ءسوز بەردى.

«ق ر كونستيتۋتسياسىنىڭ 48-بابىنا سايكەس، سىزگە پرەزيدەنت كۋالىگىن، كەۋدەگە تاعاتىن بەلگىسىن جانە بايراعىن، «التىن قىران» وردەنىن تاپسىرۋعا رۇقسات ەتىڭىز»، - دەگەن ب. يماشيەۆ قاسىم- جومارت توقايەۆقا پرەزيدەنت كۋالىگىن، كەۋدەگە تاعاتىن ءتوس بەلگىسىمەن جانە بايراعىن، «التىن قىران» وردەنىن تاپسىردى.

قازىرگى ۋاقىتتا قاسىم- جومارت توقايەۆ ءسوز سويلەۋدە.

اۆتور: مارلان جيەمباي

سوڭعى جاڭالىقتار