قاسىم-جومارت توقايەۆتىڭ قازاقستان حالقىنا انت بەرۋ ءراسىمى باستالدى

استانا. قازاقپارات - ەلوردادا ق ر پارلامەنتى پالاتالارىنىڭ بىرلەسكەن وتىرىسى باستالدى. وتىرىس بارىسىندا رەسپۋبليكا پرەزيدەنتى وكىلەتتىگىن ۋاقىتشا اتقاراتىن قاسىم-جومارت توقايەۆ قازاقستان حالقىنا انت بەرەدى، دەپ حابارلايدى قازاقپارات ءتىلشىسى.

الدىمەن ق ر پارلامەنتى ءماجىلىسىنىڭ ءتوراعاسى نۇرلان نىعماتۋللين ق. توقايەۆتىڭ رەسپۋبليكا پرەزيدەنتى وكىلەتتىگىن ۋاقىتشا اتقارۋعا كىرىسۋىنە ارنالعان شارانىڭ اشىق ەكەندىگىن جاريا ەتتى. وسىدان كەيىن بىرلەسكەن وتىرىسى ءوتىپ جاتقان زالعا قۇرمەتتىڭ قاراۋىل ەلىمىزدىڭ تۋىن، كونستيتۋتسياسىن اكەلدى. كەلەسى كەزەكتە ەلىمىزدىڭ تۇڭعىش پرەزيدەنتى - ەلباسى نۇرسۇلتان نازاربايەۆ بارشا دەپۋتاتتاردىڭ قوشەمەتىمەن زالعا كىرىپ، جوعارى ورىنعا وتىردى.

بىرلەسكەن وتىرىسقا ق ر تۇڭعىش پرەزيدەنتى - ەلباسى نۇرسۇلتان نازاربايەۆ، ۇكىمەت مۇشەلەرى، پرەزيدەنتكە تىكەلەي باعىناتىن جانە ەسەپ بەرەتىن مەملەكەتتىك ورگانداردىڭ باسشىلارى، قازاقستاندا تىركەلگەن شەتەلدىك ميسسيالاردىڭ باسشىلارى، سەنات دەپۋتاتتارى، ءماجىلىس دەپۋتاتتارى قاتىسىپ وتىر.

ايتا كەتەيىك، ق ر كونستيتۋتسياسىنىڭ 48-بابىنا سايكەس قازاقستان رەسپۋبليكاسىنىڭ پرەزيدەنتى قىزمەتىنەن مەرزىمىنەن بۇرىن بوساعان جاعدايدا رەسپۋبليكا پرەزيدەنتىنىڭ وكىلەتتىگى قالعان مەرزىمگە پارلامەنت سەناتىنىڭ ءتوراعاسىنا كوشەدى. سونىمەن قاتار ءدال وسى باپتا وزىنە رەسپۋبليكا پرەزيدەنتىنىڭ وكىلەتتىگىن قابىلداعان تۇلعا ءوزىنىڭ وكىلەتتىگىن تاپسىراتىندىعى كورسەتىلگەن.

قاسىم-جومارت كەمەل ۇلى 1953-جىلى 17- مامىردا تۋعان، قازاق. ماسكەۋ مەملەكەتتىك حالىقارالىق قاتىناستار ينستيتۋتىن، بەيجىڭ لينگۆيستيكالىق ينستيتۋتىن (ق ح ر)، رەسەي فەدەراتسياسى سىرتقى ىستەر مينيسترلىگىنىڭ ديپلوماتيالىق اكادەمياسىن بىتىرگەن. ساياسي عىلىمدارىنىڭ دوكتورى. رف سىرتقى ىستەر مينيسترلىگى ديپلوماتيالىق اكادەمياسىنىڭ قۇرمەتتى دوكتورى جانە پروفەسسورى، جەنيەۆا ديپلوماتيا جانە حالىقارالىق قاتىناستار ينستيتۋتىنىڭ قۇرمەتتى دوكتورى، بۇكىل الەمدىك جاراتىلىس تانۋ جانە گۋمانيتارلىق اكادەمياسىنىڭ تولىق مۇشەسى. ديپلوماتيالىق دارەجەسى - توتەنشە جانە وكىلەتتى ەلشى.

قازاقستان رەسپۋبليكاسىنىڭ پرەمەر-ءمينيسترى، مەملەكەتتىك حاتشى، سىرتقى ىستەر ءمينيسترى. ءۇشىنشى، ءتورتىنشى سايلانىمداعى ق ر پارلامەنتى سەناتىنىڭ ءتوراعاسى، ب ۇ ۇ باس حاتشىسىنىڭ ورىنباسارى، ب ۇ ۇ- نىڭ جەنيەۆاداعى بولىمشەسىنىڭ باس ديرەكتورى، قارۋسىزداندىرۋ كونفەرەنتسياسىنىڭ باس حاتشىسى قىزمەتتەرىن اتقارعان. 2013-جىلعى 16- قازاندا ق ر پرەزيدەنتىنىڭ جارلىعىمەن پارلامەنت سەناتىنىڭ دەپۋتاتتىعىنا تاعايىندالىپ، سەنات ءتوراعاسى بولىپ سايلاندى. 2017-جىلعى 14- قىركۇيەكتە ق ر پارلامەنتى سەناتىنىڭ وتىرىسىندا پرەزيدەنتتىڭ ۇسىنىسى بويىنشا جاسىرىن داۋىس بەرۋ ارقىلى قاسىم-جومارت كەمەل ۇلى توقايەۆ سەناتتىڭ ءتوراعاسى بولىپ قايتادان سايلاندى.