زيالى قاۋىم وكىلدەرى: قازاقستان مادەنيەتى دامىعان وركەنيەتتى ەلگە اينالدى
«قازاقستان رەسپۋبليكاسىنىڭ پرەزيدەنتى وكىلەتتىگىن توقتاتۋىڭىز تۋرالى بۇگىنگى ءسىزدىڭ ۇندەۋىڭىزدى قازاقستاندىقتار، ونىڭ ىشىندە قازاق ونەرىنىڭ قارا شاڭىراعى م. اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ۇجىمى دا تولقي، ەرەكشە تەبىرەنىسپەن قابىلدادى. سىزگە تاۋەلسىز ەلدىڭ العاشقى باسشىسى بولۋ مارتەبەسى بۇيىردى. ءوزىڭىز جۇرگىزگەن مەملەكەتتىك سارابدال ساياساتىڭىزدىڭ ارقاسىندا قازاقستان شىن مانىسىندەگى تاۋەلسىز دە ەركىن، ەكونوميكاسى مەن مادەنيەتى دامىعان وركەنيەتتى ەلگە اينالدى، الەم قاۋىمداستىعىنان لايىقتى ورىن الدى»، - دەلىنگەن زيالى قاۋىم وكىلدەرىنىڭ بىرلەسكەن مالىمدەمەسىندە.
مادەنيەت سالاسىنداعى مەملەكەتتىك ساياساتىڭىز - مادەني جانە رۋحاني قۇندىلىقتاردى جاساۋعا، جاڭعىرتۋعا، قايتا تۇلەتۋگە، ساقتاۋعا، دامىتۋعا، تاراتۋعا جانە پايدالانۋعا باعىتتالعانىن ماقتانىشپەن ايتۋىمىزعا بولادى. تاۋەلسىزدىك جىلدارى ۇلتتىق ونەر، ساحنا ونەرى قۇلاشىن كەڭگە جايدى. ءوزىڭىزدىڭ باستاماڭىزبەن رەسپۋبليكادا تاۋەلسىزدىك جىلدارى كوپتەگەن جاڭا تەاترلار اشىلدى، تالانتتى بىرنەشە جاس بۋىن ءوسىپ شىقتى.
پىكىر بىلدىرگەندەردىڭ اراسىندا ك س ر و حالىق ءارتىسى ءاسانالى ءاشىموۆ، م. اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ديرەكتورى ءسابيت ءابدىحالىقوۆ باستاعان ءبىر توپ مادەنيەت قايراتكەرلەرى بار.
سونداي-اق، قازاق ۇلتتىق ونەر ۋنيۆەرسيتەتىنىڭ رەكتورى ايمان مۇساقوجايەۆا پرەزيدەنتتىڭ ۇندەۋىنە پىكىر ءبىلدىردى.
«نۇرسۇلتان ءابىش ۇلى نازاربايەۆ الەمنىڭ قازىرگى تاريحىنداعى كەمەڭگەر تۇلعا. بايتاق ەلىمىز، تۇڭعىش پرەزيدەنتىمىزدىڭ باسشىلىعىمەن الەم مويىنداعان، جاھانعا اتى جەتكەن مەملەكەتكە اينالدى. سونىمەن قاتار، ەلىمىزدىڭ ەكونوميكاسىن جاقسارتىپ، حالقىمىزدىڭ ءال اۋقاتىن كوتەردى»، - دەيدى ول.