لاۋرا دەمەسىنوۆا: ەل تاريحىنداعى وتە ماڭىزدى كەزەڭگە اياق باستىق
«بولاشاق» قاۋىمداستىعىنىڭ اتقارۋشى ديرەكتورى لاۋرا دەمەسىنوۆا وسىلاي دەيدى، دەپ حابارلايدى قازاقپارات ءتىلشىسى.
«ءبىزدىڭ ەلىمىزدىڭ تاريحىنداعى وتە ماڭىزدى كەزەڭگە اياق باستىق. وسى ۋاقىتتىڭ ىشىندە كوپتەگەن وقيعالار بولدى، ءبىزدىڭ رەسپۋبليكا دا، ونىمەن بىرگە ءوزىمىز دە وستىك. 1993 الدە، 1994-جىلى ما ەكەن، مەن پرەزيدەنتتى تۇڭعىش رەت كورگەن بولاتىنمىن. نۇرسۇلتان ءابىش ۇلى نازاربايەۆ تالدىقورعانداعى الاڭدا مىنبەردەن سويلەپ تۇرعان تۇسىندا پرەزيدەنتتى كورسەتۋ ءۇشىن شەشەم مەنى يىعىنا كوتەرىپ الدى. ماعان ەلباسى الىستان كورىنىپ تۇرسا دا، كوز الدىمدا ويلى ءارى اشىق ادام رەتىندە ساقتالىپ قالدى»، - دەيدى «بولاشاق» قاۋىمداستىعىنىڭ اتقارۋشى ديرەكتورى لاۋرا دەمەسىنوۆا.
ول ەلباسى باستاعان «بولاشاق» باعدارلاماسى بويىنشا وقىپ كەلىپ، ەلباسى نەگىزىن قالاعان ەلوردادا تۇرىپ جاتقانىن ايتادى.
«مەملەكەت باسشىسىنا بارلىعى ءۇشىن راحمەت ايتامىن! قازاقستاننىڭ اسپانى اشىق بولسىن. نۇرسۇلتان ءابىش ۇلىنا ءبارىمىز دە ادالدىق ساقتاپ قالامىز. ءبىزدىڭ قازاقستاننىڭ دامۋى مەن گۇلدەنۋىنە وراسان زور ۇلەسىن قوسقان، الەمدى مويىنداتقان مەملەكەتتى وركەندەتكەن وسىنداي پرەزيدەنتىمىزدىڭ بولعانىنا قاتتى قۋانىشتىمىز»، - دەيدى ول.
ەسكە سالا كەتسەك، بۇگىن مەملەكەت باسشىسى نۇرسۇلتان نازاربايەۆ رەسپۋبليكالىق تەلەارنالار ارقىلى قازاقستان حالقىنا ارنالعان مالىمدەمەسىندە پرەزيدەنتتىك وكىلەتتىگىن توقتاتاتىنىن جاريا ەتكەن بولاتىن.