دانيار سۇندەتبايەۆ: بۇكىل الەمگە مەملەكەت بولا الاتىنىمىزدى دالەلدەدىك
«شىنى كەرەك، پرەزيدەنتتىڭ بۇل مالىمدەمەسى ءبارىمىز ءۇشىن كۇتپەگەن وقيعا بولدى. ءبىز، قازاقستاندىقتار، قازىرگى ۋاقىتتا شىنىندا دا، تاريحي ساتتە ءومىر ءسۇرىپ جاتىرمىز. سەبەبى، قازاقستاننىڭ مەملەكەتتىلىگىن بەكەمدەگەن ەلباسىمەن ءبىر كوماندادا بولۋ - ءبىز ءۇشىن زور مارتەبە. تاۋەلسىز قازاقستاننىڭ دامۋى، وركەندەۋى - ۇلكەن باقىتىمىز دەپ سانايمىن»، - دەيدى دانيار سۇندەتبايەۆ.
«جاس وتان» جاستار قاناتىنىڭ ءتوراعاسىنىڭ ايتۋىنا قاراعاندا، كەڭەس وداعى تۇسىندا وزبەكستان، گۇرجىستان، ۋكراينا ەلدەرى الدىڭعى قاتارلى ەلدەر سانالدى دا قازاقستانعا تەك شيكىزات قورى رەتىندە قارادى.
«الايدا تاۋەلسىزدىك العاننان كەيىن ت م د ەلدەرىنە عانا ەمەس، بۇكىل الەمگە مەملەكەت بولا الاتىنىمىزدى دالەلدەپ بەردىك. پرەزيدەنتتىڭ ارقاسىندا قازاق حالقى بيىك بەلەستەردى باعىندىردى. قانداي سالانى الىپ قاراساڭىز دا، قازاق حالقى ەشكىمنەن كەم ەڭبەك ەتىپ جاتقان جوق. يندۋستريا، IT سالاسى، سپورت پەن كينونى مەڭگەرۋى - قازاق حالقىنىڭ مەملەكەت بولىپ قالىپتاسقانىنىڭ ءبىر كورىنىسى»، - دەيدى ول.
دانيار سۇندەتبايەۆتىڭ سوزىنشە، قازاقستاندىقتارعا ەڭ ۇلكەن امانات - مەملەكەتتىڭ تاۋەلسىزدىگىن ساقتاي وتىرىپ، دامۋىنا، وركەندەۋىنە ءبىر كىسىدەي اتسالىسۋ.
«تاۋەلسىزدىك كەزەڭىندە تاربيەلەنگەن، ءوز ويىن اشىق ايتا الاتىن بۋىن پايدا بولدى. قازىرگى جاستار باسقاشا ويلايمىز. ءار كەزدە ءوز ۇلتىمىزدى الدىڭعى ورىنعا قويامىز. جاڭاشا ويلايتىن جاستارمىز. پرەزيدەنت ءوزى ايتقانداي، مەملەكەتتىڭ ەڭ ۇلكەن جەتىستىكتەرىنىڭ ءبىرى، ءسوزسىز - تاۋەلسىز قازاقستاننىڭ ويى وزىق جاستارىنىڭ تاربيەلەنۋى»، - دەيدى دانيار سۇندەتبايەۆ.
ەسكە سالا كەتسەك، بۇگىن مەملەكەت باسشىسى نۇرسۇلتان نازاربايەۆ رەسپۋبليكالىق تەلەارنالار ارقىلى قازاقستان حالقىنا ارنالعان مالىمدەمەسىندە پرەزيدەنتتىك وكىلەتتىگىن توقتاتاتىنىن جاريا ەتكەن بولاتىن.