ق ر پرەزيدەنتى: كەزدەسكەن قيىندىقتاردىڭ بارلىعىن تابىستى ەڭسەرە بىلدىك

استانا. قازاقپارات - كەزدەسكەن قيىندىقتاردىڭ بارلىعىن ەشكىمنىڭ كومەگىنسىز جانە تابىستى ەڭسەرە بىلدىك.

بۇل تۋرالى مەملەكەت باسشىسى نۇرسۇلتان نازاربايەۆ رەسپۋبليكالىق تەلەارنالار ارقىلى قازاقستان حالقىنا ارنالعان مالىمدەمەسىندە ايتتى، دەپ حابارلايدى قازاقپارات ءتىلشىسى.

«قۇرمەتتى قازاقستاندىقتار، وتانداستارىم، ارداقتى اعايىن، قادىرلى ارىپتەستەرىم، نۇر وتان پارتياسىنىڭ مۇشەلەرى! ەلىمىزدىڭ اسا ماڭىزدى تاريحي ساتتەرىندە حالقىما ۇندەۋ جاريالايتىندىعىمدى بىلەسىزدەر. بۇگىندە بارشاڭىزعا ۇندەۋ جاريالاعالى وتىرمىن. ءبىراق، بۇگىنگى ۇندەۋدىڭ ماڭىزى مۇلدەم باسقا جانە زور دەپ سانايمىن. مەن قازاقستان رەسپۋبليكاسىنىڭ پرەزيدەنتى رەتىندە وكىلەتتىگىمدى توقتاتۋ تۋرالى شەشىم قابىلدادىم. ارينە، بۇل وڭاي شەشىم ەمەس. بيىل ەلىمىزدىڭ ەڭ جوعارى لاۋازىمداعى قىزمەتىمدى اتقارىپ كەلە جاتقانىما 30 جىل تولادى. حالقىم ماعان تاۋەلسىز قازاقستاننىڭ تۇڭعىش پرەزيدەنتى بولۋ مۇمكىندىگىن بەردى»، - دەپ اتاپ ءوتتى ەلباسى.

مەملەكەت باسشىسى كەڭەس يمپەرياسى قۇلاعان ساتتە ەلىمىزدىڭ ساياساتى مەن ەكونوميكاسى قۇلدىراعاندىعىن ەسكە الدى. ەل ىشىندە قوبالجۋ مەن تۇسىنىكسىزدىك جاعداي ورىن العانىن اتاپ ءوتتى.

«ىشكى جالپى ءونىم ەكى ەسە قىسقاردى. ازىق- تۇلىك پەن حالىق تۇتىناتىن تاۋارلاردىڭ تاپشىلىعى ايقىن سەزىلدى. ءبىر مەزەتتە ءىرى زاۋىتتاردىڭ ءبارى توقتاپ قالدى. دۇنيە توڭكەرىلىپ كەتكەندەي كورىندى. بۇل سىناق بولاتىن. ءبىز ول سىناقتان سۇرىندەي ءوتىپ، دامۋدىڭ قازاقستاندىق جولىن سالۋعا بەلسەنە كىرىسىپ كەتتىك. ءبىزدىڭ ءۇش تۇعىرلى مىندەتىمىز - نارىقتى ەكونوميكا قۇرۋ، توتاليتارلىق جۇيەنى بۇزۋ جانە قوعامنىڭ بارلىق ينستيتۋتتارىن جاڭعىرتۋ بولدى. ءبىز مۇنى زاماناۋي دەموكراتيالىق مەملەكەت قازاقستان رەسپۋبليكاسىن قۇرۋ ءۇشىن جاسادىق. ءبىز ءالسىز ەكونوميكامەن، جاعدايى جوق ازاماتتارمەن دەموكراتيالىق ينستيتۋتتار قالىپتاستىرۋ مۇمكىن بولمايتىنىن ءتۇسىنىپ، ەكونوميكانى دامىتۋ جانە ازاماتتاردىڭ ءال- اۋقاتىن ارتتىرۋ ىسىنە باسا ءمان بەردىك»، - دەدى نۇرسۇلتان نازاربايەۆ.

مەملەكەت باسشىسىنىڭ اتاپ وتۋىنشە، سونىڭ ناتيجەسىندە ەكونوميكا كولەمى 15 ەسە، حالىقتىڭ تابىسى دوللارمەن ەسەپتەگەندە 10 ەسەگە ارتىپ، كەدەيشىلىك دەڭگەيى 10 ەسەگە جۋىق نەمەسە 3 پايىزعا جاقىن قىسقاردى.

«ءبىز 2007-2012 -جىلدارداعى اۋقىمدى الەمدىك قارجى داعدارىسىن قوسا العاندا كەزدەسكەن قيىندىقتاردىڭ بارلىعىن ەشكىمنىڭ كومەگىنسىز جانە تابىستى ەڭسەرە بىلدىك»، - دەدى نۇرسۇلتان نازاربايەۆ.