قوعامدىق ورىنداردا تاراتاتىن ناۋرىز كوجەنى ىشۋگە بولا ما - باس سانيتار جاۋابى
سپيكەردىڭ ايتۋىنشا، ۇزاققا سوزىلعان مەيرامنان كەيىن ءجىتى ىشەك ينفەكتسيالارى، تاماقتان ۋلانۋ جاعدايلارى كوبەيەدى.
"ناۋرىز مەيرامى - كوكتەمگى جاڭارۋ سيمۆولى، ماحاببات، دوستىق مەرەكەسى. ناۋرىزدى تويلاعاندا كونسەرت قانا بولمايدى، ءارتۇرلى تاعامدار مولىنان ازىرلەنەدى - ناۋرىز كوجە، باۋىرساق، ەت، قازى، شۇجىق، قۋىرداق، جەنت سىندى تەز بۇزىلاتىن ونىمدەر بار. اسىرەسە، جۇمىرتقا مەن قايماق قوسىلعان سالاتتاردى، كرەمى بار كونديتەرلىك ونىمدەردى، تارتىلعان ەت قوسىلعان ءبالىش- رۋلەتتەردى ۇزاق ساقتاۋعا بولمايدى"، - دەدى جانداربەك بەكشين استانادا وتكەن باسپا ءسوز ءماسليحاتىندا.
ونىڭ ايتۋىنشا، جاپپاي قىدىراتىن ورىنداردا دا تاعام قاۋىپسىزدىگىنە ءمىن بەرگەن ءجون.
"جاپپاي قىدىراتىن ورىنداردا جەكە ادامدار ساتاتىن تاماق ءونىمىن، ادەتتە ناۋرىز كوجە مەن قىمىزدى ساتىپ الماۋعا تىرىسىڭىز. دايىن ءونىمنىڭ، ەت، تاۋىق ەتى قوسىلىپ پىسىرىلەتىن تاعامنىڭ، كاۋاپ، حوت- دوگ، ءسەندۆيچتىڭ ساقتالۋىنا نازار اۋدارىڭىز، ولار ءتيىستى تەمپەراتۋرادا ساقتالۋى، ساۋدا ورنىندا مىندەتتى تۇردە بولۋى ءتيىس توڭازىتقىشتاردا ساقتالۋى كەرەك. بارلىق ءونىم ورالعان بولۋى ءتيىس، قاپتامالارىندا تاعامنىڭ شىعارىلعان كۇنى، وندىرىستىك كاسىپورىن اتاۋى كورسەتىلەدى"، - دەدى ول.
سونىمەن بىرگە، باس سانيتارعا "ساۋدا جانە ويىن- ساۋىق ورتالىقتارىندا، الاڭداردا تاراتىلاتىن ناۋرىز كوجە قانشالىقتى قاۋىپسىز؟ " دەگەن سۇراق قويىلدى.
"اكىمدىك ۇيىمداستىرعان جيىنداردا بەرىلەتىن ناۋرىز كوجە قاۋىپسىز. سەبەبى ونى ارنايى ءدامحانالار مەن مەيرامحانالاردا دايىندايدى. وندا جالپىعا تاراتاتىن ناۋرىز كوجە جەرگىلىكتى ۇيىمداردىڭ ءجىتى قاداعالاۋىنان وتكەن. ال ءبىر قۋىستا، شەتتە بەلگىسىز ادامدار ساتاتىن ناۋرىز كوجەلەردەن ساقتانۋ كەرەك"، - دەپ جاۋاپ بەردى ج. بەكشين.