ناۋرىز مەرەكەسىنە تارتۋ: تەلەارنالار كورەرمەندەرگە قانداي سىي دايىنداپ جاتىر
«21 - ناۋرىزدان باستاپ ءۇش كۇن قاتارىنان ادامزات تاريحىنداعى جىلقىنىڭ ءرولى مەن ورتالىق ازيا دالالارىنداعى جىلقىنىڭ شىعۋ تەگى تۋرالى باياندايتىن حالىقارالىق «ەquus: جىلقى تاريحى» اتتى دەرەكتى تريلوگيانىڭ تۇساۋكەسەرى بولادى. ال ناۋرىزدىڭ 22- كۇنى ۇلتتىق ارنا تۇركيا، قىرعىزستان، وزبەكستان سەكىلدى باۋىرلاس مەملەكەتتەرمەن حالىقارالىق تەلەكوپىر ارقىلى بايلانىس ورناتىپ، ءار ەلدەگى مەرەكەلىك اتموسفەرامەن ءبولىسىپ، سول ەلدەردەگى ناۋرىز مەرەكەسىن تويلاۋ ءداستۇرى جايلى سيۋجەتتەر مەن ارنايى سۇحباتتار ۇسىناتىن بولامىز. سونىمەن قاتار، مەرەكە كۇندەرى «كۇننەن تۋعان بالا.. .» ، «امال ايشىقتارى» سەكىلدى دەرەكتى سيپاتتاعى ارنايى جوبالار ءۇش كۇن قاتارىنان ەفيرگە شىعادى. تاعى ءبىر ەرەكشە ايتا كەتەتىن اقپارات - بيىل ءبىز «ناۋرىز- دۋمان» اتتى ارنايى جوبا جوسپارلاپ، ەفيرگە ازىرلەدىك. ۇزاقتىعى 2,30 ساعاتقا سوزىلاتىن جاڭا جوبا ناۋرىز مەرەكەسىنە وراي كورەرمەندەرگە ارناعان ۇلكەن تارتۋىمىز» ، - دەدى «Qazaqstan» تەلەارناسىنىڭ ديرەكتورى ەركىن مۇحامەدجانوۆ و ك ق- دا وتكەن «ناۋرىز مەرەكەسىنە تارتۋ» اتتى باسپا ءسوز ءماسليحاتىندا.
ال، «Qazsport» تەلەارناسى مەيرام كۇندەرى تىكەلەي ەفيردە فۋتبولدان قازاقستان ۇلتتىق قۇراماسىنىڭ ەۋروپا چەمپيوناتىنا ىرىكتەۋ ويىندارىن، ءبىرقاتار قىزىقتى باعدارلامالار، دەرەكتى فيلمدەر مەن سپورت ساڭلاقتارىنىڭ سۇحباتتارىن كورسەتەتىن بولادى.
ارنا باسشىسى پاۆەل سىبۋليننىڭ ايتۋىنشا، كورەرمەندەر 21 - ناۋرىز كۇنى ХХІХ قىسقى ۋنيۆەرسيادا ويىندارىنىڭ قولا جۇلدەگەرى جانبوتا الدابەرگەننىڭ سۇحباتىن، ودان بولەك بىرنەشە دەرەكتى فيلمدەر، اتاپ ايتقاندا اتى اڭىزعا اينالعان قازاق قاقپاشىسى قۇرالبەك وردابايەۆ جايىندا - «قازاقتىڭ №1 قاقپاشاسى» ، قازاق بوكسىنىڭ دامۋىنا ۇلكەن ۇلەس قوسقان جاتتىقتىرۋشى مىرزاعالي ايتجانوۆ تۋرالى «بولمىسى بولەك باپكەر» ، 22- ناۋرىزدا تالانتتى بىلعارى قولعاپ شەبەرى، 2005 -جىلعى الەم چەمپيونى ەردوس جاڭابەرگەنوۆ جايىندا «دارابوز» ، حالىقارالىق «اتلانت» فەستيۆالىنىڭ جەڭىمپازى اتانعان «يستوريا مالەنكوي رۋسالكي» دەرەكتى فيلمدەرىن تاماشالاي الادى.
كىشكەنتاي كورەرمەندەرگە ارنالعان «balapan» تەلەارناسى وسى كوكتەمگى تەلەماۋسىمدا كورەرمەن نازارىنا بارلىعى 22 جوبا ۇسىنادى. ونىڭ ىشىندە 6 اۋى ىشكى ءونىم، ال 10 ى شەتەلدىك ۇزدىك انيماتسيالار مەن دەرەكتى فيلمدەر توپتاماسى، 3 تەلەحيكايا جانە 3 You Tube قا ارنالعان جوبالار.
«بيىل بالالار ارناسىندا تۇڭعىش رەت تاڭعى باعدارلاما جارىققا شىقتى. ويىن- ساۋىق جانە اقپاراتتىق باعىتتاعى «تاڭجارىق» حابارىن كىشكەنتاي كورەرمەندەر سەنبى جانە جەكسەنبى كۇندەرى تاماشالاي الادى. ال «بالامەن سۇحبات» باعدارلاماسىندا بالالار ەلىمىزگە بەلگىلى، ءومىرى مەن ەڭبەك جولى ۇرپاققا ۇلگى بولارلىق تۇلعالارمەن اڭگىمە- دۇكەن تۇرىندە سۇحبات قۇرادى» ، - دەيدى «Balapan» تەلەارناسىنىڭ ديرەكتورى ماقپال جۇماباي.
بىلتىردان بەرى حابار تاراتا باستاعان «Tamasha tv» ارناسىنىڭ ديرەكتورى ەسەن ەلەۋكەن دە بىرنەشە جاڭالىقتارىمەن ءبولىستى. ونىڭ ايتۋىنشا، جاڭا ماۋسىم اياسىندا بيىل ارنا كورەرمەندەرگە 14 جوبا تارتۋ ەتپەك.
«العاشقى 8 جوبا ناۋرىز ايىندا شىقسا، قالعان 6 جوبانى ساۋىرگە جوسپارلاپ وتىرمىز. ولاردىڭ بارلىعى دەرلىك جاڭادان شىعىپ جاتقان باعدارلامالار، ارينە ازىلگە قاتىستى. سونداي- اق، ويىن- ساۋىقتىق باعدارلامالار دا بار. ەڭ باستى ۇلكەن جوبالارىمىزدىڭ ءبىرى «تاماشا Club» ازىلگە قاتىسى بار جاستاردىڭ ءارتۇرلى وبرازداعى قىسقاشا قويىلىمداردان قۇرالعان سكەتچ- شوۋ. «ءبىر عانيبەت» جوباسىن دا ەرەكشە اتاپ وتكىم كەلەدى، ءبىزدىڭ بەلگىلى اعا- اپكەلەرىمىز وزدەرىنىڭ باسىنان وتكەن ازىلگە تولى قىزىقتى وقيعالارىمەن بولىسەدى. سونداي- اق، جالپى قازاق ساتيراسىنا، قازاق ازىلىنە، قازاق قالجىڭىنا قاتىستى ومىردەن وتكەن جاندارعا ارنالعان « ءازىل- داستان» جوباسى شىعاتىن بولادى. بۇل جوبانى تانىمال ساتيريك - كوپەن امىربەك جۇرگىزەدى. ال، «تاۋىپ كور» تانىمدىق باعدارلاماسىنا قاراپايىم ادامدار قاتىسادى. ولار وزدەرىنە بەرىلگەن 4-5 تاپسىرما ارقىلى كىممەن سويلەسىپ وتىرعانىن تاۋىپ الۋعا تىرىساتىن بولادى» ، - دەيدى ەسەن ەلەۋكەن.