لوندون كىتاپ كورمەسىندە قازاقستاندىق باسپا ونىمدەرى تانىستىرىلدى

 استانا. قازاقپارات - كورمەدە «ۇلتتىق اۋدارما بيۋروسى» قوعامدىق قورى قازاقستاننىڭ ۇلى بريتانيا جانە سولتۇستىك يرلاندياداعى ەلشىلىگىنىڭ قولداۋىمەن وتاندىق باسپالاردان سوڭعى جىلدارى شىققان كىتاپتارىن ۇسىندى.

جالپى ۇسىنىلعان 140 اتالىم كىتاپتىڭ 32 اعىلشىن، وزگەسى قازاق، ورىس، يسپان، فرانسۋز، نەمىس تىلدەرىندە بولدى.

 لوندون كىتاپ كورمەسىنىڭ العاشقى كۇنى «ۇلتتىق اۋدارما بيۋروسى» مەن «Cambridge University Press» باسپاسى جانە  ۇلىبريتانياداعى قازاقستان ەلشىلىگىمەن بىرلەسە وتىرىپ، قازىرگى قازاق ادەبيەتى انتولوگيالارىنىڭ اعىلشىن تىلىندەگى العاشقى نۇسقالارىمەن تانىستىردى.

 قازىرگى قازاق ادەبيەتى ۇلگىلەرىن ب ۇ ۇ- نىڭ 6 تىلىنە اۋدارۋ جۇمىسى «جاھانداعى زاماناۋي قازاقستاندىق مادەنيەت» جوباسى نەگىزىندە ىسكە اسىرىلۋدا. بۇل جوبا ق ر پرەزيدەنتى ن. ءا. نازاربايەۆتىڭ باستاماسىمەن قولعا الىنعان «رۋحاني جاڭعىرۋ» باعدارلاماسى باعىتتارىنىڭ ءبىرى. جيناققا پروزا جانە پوەزيا باعىتتارى بويىنشا 60 اۆتوردىڭ شىعارماسى ەندى.

كورمە اياسىندا ۇيىمداستىرىلعان سەمينارعا قازاقستاننىڭ ۇلى بريتانياداعى ەلشىسى ەرلان ىدىرىسوۆ، «ۇلتتىق اۋدارما بيۋروسى» قوعامدىق قورىنىڭ اتقارۋشى ديرەكتورى راۋان كەنجەحان ۇلى، «Cambridge University Press» باسپاسىنىڭ ءبىلىم بەرۋ رەفورماسى جونىندەگى ديرەكتورى دجەين مانن، كەمبريدج ۋنيۆەرسيتەتىنىڭ ءبىلىم بەرۋ سالاسىنداعى يننوۆاتسيالار جونىندەگى ديرەكتورى جانە ءبىلىم بەرۋ رەفورماسى مەن يننوۆاتسيالار توبىنىڭ جەتەكشىسى، پروفەسسور كوللين ماكلافلين جانە اقىن، «The High Window» باسىلىمىنىڭ نەگىزىن قالاۋشى دەۆيد كۋك قاتىستى.

«بۇل - بريتانيا جانە باتىس حالقىن ادەبيەتىمىز ارقىلى ەلىمىزدىڭ تاريحى مەن مادەنيەتىن تانىستىرۋعا باعىتتالعان وتە ماڭىزدى جوبا. ەلشى رەتىندە قازاقستانعا دەگەن قىزىعۋشىلىقتىڭ كۇن ساناپ ارتىپ جاتقانىن كورۋ - مەن ءۇشىن ۇلكەن قۋانىش. بۇل جوبا وسىنداي قىزىعۋشىلىقتى ارى قاراي ارتتىرىپ، نىعايتا تۇسەتىن كاتاليزاتور بولادى دەگەن سەنىمدەمىن» ، - دەدى ەرلان. ىدىرىسوۆ.

جيناقتاردىڭ اعىلشىن تىلىندەگى نۇسقاسى بيىلعى جىلدىڭ قىركۇيەگىندە جارىققا شىعادى دەپ جوسپارلانعان. ونى اعىلشىن تىلىنە اۋدارۋ، باسىپ شىعارۋ جانە تاراتۋ جۇمىسىمەن «Cambridge University Press» باسپا ءۇيى اينالىسادى. تانىمال ۋنيۆەرسيتەت باسپاسى جوباعا تاجىريبەلى اۋدارماشىلار مەن بەدەلدى ادەبيەتشى مامانداردى تارتقان. وزگە تىلدەردەگى انتولوگيالاردى اۋدارىپ باسۋ جانە ناسيحاتتاۋ ىسىنە يسپانيا، قىتاي، ەگيپەت، رەسەي جانە فرانسيا مەملەكەتتەرىنىڭ جەتەكشى باسپا ۇيىمدارى اتسالىسادى.

لوندون كىتاپ كورمەسى - باسپا سالاسىنىڭ وزەكتى ماسەلەلەرى تالقىلانىپ، مامانداردىڭ بايلانىس ورناتاتىن كەلىسسوزدەر الاڭى. كورمە شەڭبەرىندە حالىقارالىق ءىرى باسپا ۇيىمدارىنىڭ وكىلدەرىمەن قازاقستاندا ىسكە اسىپ جاتقان «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسىنىڭ بارىسى تالقىلاندى. اتاپ ايتساق، «Cambridge University Press» ، «Oxford University Press» ،«Pearson» جانە وزگە دە تانىمال باسپالار جاڭا وقۋلىقتارى مەن كىتاپتارىن «ۇلتتىق اۋدارما بيۋروسىنا» تانىستىرىپ، ولاردى اۋدارما جوباسىنا قوسۋدى ۇسىندى.

«ۇلتتىق اۋدارما بيۋروسى» ۇسىنعان ءىلياس جانسۇگىروۆتىڭ اعىلشىن تىلىنە تۇڭعىش رەت اۋدارىلعان «قۇلاگەر» پوەماسى كوپشىلىكتىڭ سۇرانىسىنا يە بولدى. ۇلتتىق اۋدارما بيۋروسى قارجىلاندىرعان بۇل باسىلىمنىڭ اعىلشىن تىلىندەگى اۋدارماسىن بريتاندىق اقىن بەليندا كۋك جاسادى.

«جىلقى - يرلاندىقتاردىڭ دا سۇيىكتى جانۋارى، سوندىقتان بولار، كىتاپ سىرتىنداعى جىلقى بەينەسى كوزىمە ىستىق كورىندى. بۇل كىتاپ مەن وسىعان دەيىن بىلمەي كەلگەن تاماشا پوەزياعا اشىلعان تەرەزە بولدى»، - دەيدى بەركبەك ۋنيۆەرسيتەتىنىڭ ستۋدەنتى سارا مەي.

 قىرىق سەگىزىنشى رەت وتكەن لوندون كىتاپ كورمەسىنە الەمنىڭ تۇكپىر- تۇكپىرىنەن 25 مىڭنان اسا باسپا سالاسىنىڭ ماماندارى جينالدى. 1971 -جىلدان باستاپ ءداستۇرلى تۇردە جىل سايىن وتكىزىلىپ كەلەدى. ال لوندون كىتاپ كورمەسىندەگى قازاقستاندىق ەكسپوزيتسيا وسىمەن ەكىنشى رەت ۇيىمداستىرىلدى. قازاقستاندىق باسپالاردىڭ كىتاپتارى «رۋحاني جاڭعىرۋ» باعدارلاماسىنىڭ برەند- بەلگىسىمەن بەزەندىرىلگەن ستەندتەرگە قويىلدى.