تانىمال تۇلعالار مەن شەتەلدىك ەلشىلەر جەتىم بالالاردىڭ تۇساۋىن كەستى

استانا. قازاقپارات - ەلىمىزگە تانىمال تۇلعالار جانە شەتەلدىك ەلشىلىك قىزمەتكەرلەرى اتا- انا قامقورلىعىنان ايىرىلعان سابيلەردىڭ تۇساۋىن كەستى، دەپ حابارلايدى قازاقپارات ءتىلشىسى.

ق ر ۇلتتىق مۋزەيىنىڭ باستاماسىمەن قولعا الىنعان «تۇساۋكەسەر» قايرىمدىلىق جوباسى بيىل ءتورتىنشى رەت ۇيىمداستىرىلىپ وتىر.

«ەلباسى نۇرسۇلتان نازاربايەۆ ءوزىنىڭ «بولاشاققا باعدار: رۋحاني جاڭعىرۋ» باعدارلاماسىندا تاريحىمىز بەن سالت- ءداستۇرىمىزدى ساقتاپ قانا قويماي، دۇنيە جۇزىنە كەڭىنەن ناسيحاتتاۋىمىز كەرەكتىگىن ەرەكشە اتاپ ءوتتى. ناۋرىز - ءبىزدىڭ ءتول مەرەكەمىز. بۇل ايتۋلى مەرەكەنى جاڭا ۇلگىدە تويلاۋ تۋرالى ۇسىنىس بىلدىرگەن بولاتىنمىن، وندا بۇلدىرشىندەرگە باسا نازار اۋدارىلسا دەدىك. سول سەبەپتى تۇساۋكەسەر ءراسىمى ۇيىمداستىرىلىپ وتىر. سونىمەن بىرگە، بۇگىنگى شاراعا بالالار ۇيىنەن جانە الەۋمەتتىك جاعدايى تومەن وتباسى بالالارى ارنايى شاقىرىلدى، ولارعا سىي- سياپات بەرىپ، كوڭىلدەرىن كوتەرگىمىز كەلەدى» ، - دەدى ق ر مادەنيەت جانە سپورت ءمينيسترى ارىستانبەك مۇحامەدي ۇلى «ناۋرىز - جاڭارۋ نىشانى» شوۋ- باعدارلاماسىنىڭ سالتاناتتى اشىلۋىندا.

 

تۇساۋكەسەر راسىمىنە №2 مامانداندىرىلعان بالالار ۇيىنەن رامازان نۇرحاتوۆ، ايدىن بەكىشيەۆ، ءىنجۋ بەكىشيەۆا، ماكسيم ترەتياكوۆ، ارىستان بەگالي، ءالجان ابدۋوۆ، الىبەك جامانقۇلوۆ ارنايى كەلدى.

 

 ولاردىڭ تۇساۋىن ق ر مادەنيەت جانە سپورت ءمينيسترى ارىستانبەك مۇحامەدي ۇلى مەن قازاقستانداعى ە و وكىلدىگىنىڭ باسشىسى سۆەن- ولوۆ كارلسسون، ق ر ۇلتتىق مۋزەيى ديرەكتورىنىڭ مىندەتىن اتقارۋشى الماز نۇرازحان، «قاسيەتتى قازاقستان» عىلىمي زەرتتەۋ ورتالىعىنىڭ باسشىسى بەرىك ءابدىعالي، تاريح عىلىمدارىنىڭ دوكتورى، پروفەسسور جامبىل ارتىقبايەۆ، ساتيريك كوپەن امىربەك، قازاقستاننىڭ ەڭبەك سىڭىرگەن قايراتكەرى، ءداستۇرلى ءانشى ايگۇل قوسانوۆا جانە شەت مەملەكەتتەردىڭ قازاقستانداعى ەلشىلىك وكىلدەرى كەستى.

 

«تۇساۋكەسەر ءراسىمى ءۇشىن جىل سايىن ناۋرىز مەرەكەسىندە ۇلتتىق مۋزەيگە كەلەمىز. بيىل ءتورتىنشى رەت بالالارىمىزدىڭ تۇساۋى كەسىلىپ، جاقسى تىلەكتەر ايتىلىپ جاتىر. كوپ جاعدايدا تۇساۋى كەسىلگەن بالالار جاڭا وتباسىلارىن تابادى. سول ءۇشىن ۇلتتىق مۋزەيدەگى ۇيىمداستىرۋشىلارعا العىسىمىز شەكسىز» ، - دەدى №2 مامانداندىرىلعان بالالار ءۇيىنىڭ تاربيەشىسى، پسيحولوگ گۇلجان تولەسوۆا.

 

تۇساۋكەسەردەن سوڭ، كونسەرتتىك باعدارلاما جالعاسىن تاۋىپ، تەاترلاندىرىلعان قويىلىم، ايتىس ونەرى، ءان، بي، ارقان تارتىس، كيىز باسۋ جانە قولونەر بويىنشا شەبەرلىك ساباقتارى ءوتتى.

  ايتا كەتەيىك، 21 - ناۋرىز كۇنى ۇلتتىق كيىم كيگەندەر مۋزەيگە تەگىن كىرەدى. بۇل ءۇشىن الەۋمەتتىك جەلىدەگى (فەيسبۋك - ق ر ۇلتتىق مۋزەيى، ينستاگرام - Nationalmuseumkz, تەلەگرامم- ق ر ۇلتتىق مۋزەيى) ۇلتتىق مۋزەي پاراقشالارىنا تىركەلىپ، #ۇلتتىق مۋزەي حەشتەگىن بەلگىلەۋ قاجەت.