قوستانايداعى ناۋرىز تويى: «اجەمنىڭ باۋىرساقتارى»، پالاۋ كورمەسى

 قوستاناي. قازاقپارات - قوستانايدا ناۋرىز مەيرامىنا ارنالعان ءىس- شارالار جوسپارى جاريالاندى، دەپ حابارلايدى قازاقپارات قالا اكىمدىگىنىڭ باسپا ءسوز قىزمەتىنە سىلتەمە جاساپ.

ۇلىستىڭ ۇلى كۇنىنە ارنالعان شارالار قوستاناي قالاسىنىڭ ورتالىق الاڭىندا 22 - ناۋرىزدا باستالادى. جىلداعى ءداستۇر بويىنشا، كيىز ۇيلەر قاز-قاتار قۇرىلادى. ۇزدىك بەزەندىرۋ بايقاۋىنا كاسىپورىندار، كاسىپكەرلەر مەن وقۋ ورىندارى قاتىسادى. ولار اق ءۇي ىشىندە مەرەكەلىك داستارحان جايادى. سونداي- اق، قالادا تەاترلاندىرىلعان قويىلىمدار، حورلار شەرۋى جانە مەرەكەلىك كونسەرت ناۋرىزدىڭ كورىگىن قىزدىرماق.

ساعات 10:00 دە «شىعىس - ۇقىپتى ءىس» ەتنوگرافيالىق فەستيۆالى مەن «پالاۋ - داستارحان قازىناسى» كورمەسى باستالادى. وسى ۋاقىتتا «اجەمنىڭ ءتاتتى باۋىرساقتارى» اتتى كەلىندەر بايقاۋى قاتار وتەدى.

ءتۇس الەتىندە «ناۋرىزبەك- ناۋرىزگۇل!» اتتى قالانىڭ جاس ارتىستەرىنىڭ قاتىسۋىمەن كوكتەمگى ەسىمدەر مەرەكەسى ۇيىمداستىرىلادى. قالالىق بالالار شىعارماشىلىعى مەكتەبى ۇجىمىنىڭ كونتسەرتى 12:30 دا باستالادى.

بۇعان قوسا، قوستانايدىڭ ءدامحانالارى مەن مەيرامحانالارىنىڭ اسپازدارى اراسىندا اسپازدار سايىسىن وتكىزۋ جوسپارلانعان. قولونەر شەبەرلەرىنە دە ءوز تۋىندىلارىن سىناپ كورۋگە مۇمكىندىك بەرىلەدى. بارلىق سايىستىڭ ۇزدىكتەرى سىيلىقتارمەن، العىس حاتتارمەن ماراپاتتالادى.

 مەرەكەلىك شارا «ارمانداستار» ۆوكالدىق ستۋدياسى جانە «اق داريعا» قازاق اندەرى حورىنىڭ كونسەرتىمەن اياقتالادى.