استاناداعى ناۋرىزدىڭ نەگىزگى شارالارى قاي جەردە وتەدى

استانا. قازاقپارات - بيىل ەكسپو ايماعىندا تاعى ناۋرىز مەيرامىنا ارنالعان ەتنواۋىل اشىلادى. ءبىراق وسى جولى ونىڭ ورنالاسۋى ايماعى ءسال ىعىستى. ەتنواۋىل بيىك ستەلا تۇرعان بەيبىتشىلىك پەن كەلىسىم اللەياسىنىڭ الدىندا ورنالاسادى، دەپ حابارلايدى قازاقپارات ءتىلشىسى.

«استانا ەكسپو» ۇلتتىق كومپانياسىنىڭ كوممەرتسياليزاتسيا دەپارتامەنتىنىڭ باسشىسى داۋلەت ەركەمبايەۆتىڭ ايتۋىنشا، وتكەن جىلى ناۋرىز مەيرامىنا ارنالعان نەگىزگى الاڭ كونگرەسس- ورتالىققا قاراما- قارسى ورنالاسقان. بىلتىر ول جەرگە تال ەگىپ، ساياباق اشىلعان بولاتىن. سول سەبەپتى بيىلعى ناۋرىزدىڭ نەگىزگى شارالارىن بەيبىتشىلىك پەن كەلىسىم اللەياسىنا جاقىن اشىق الاڭدا وتكىزۋ تۋرالى شەشىم قابىلداندى.

«ەستەرىڭىزدە بولسا، ەكسپو كورمەسى كەزىندە سولتۇستىك كىرەبەرىس بولدى. ءدال سول جەردە ناۋرىز مەيرامىنا ارنالعان نەگىزگى شارالار وتەدى. ءقازىر كيىز ۇيلەر تىگىلىپ، قاجەتتى قۇرال- جابدىقتار ورناتىلىپ جاتىر. بۇل رەسپۋبليكاداعى باستى الاڭ بولادى. 21 - نارۋىزدا رەسمي اشىلۋى وتەدى. ءداستۇر بويىنشا بارلىق شارالار ۇيىمداستىرىلادى. پرەزيدەنت تە كەلەدى دەگەن جوسپار بار» ، - دەدى دەپارتامەنت باسشىسى.

ونىڭ سوزىنە قاراعاندا، بۇرىنعى الاڭنىڭ تەرريتورياسى تىم ۇلكەن بولدى. سەبەبى ەكسپو كورمەسى كەزىندە ول جەردە ۇلكەن ساحنا تۇرعان جانە اۋقىمدى كونسەرتتەر ۇيىمداستىرىلدى. ال كورمەدەن كەيىن ونداي ايماقتى بوس ۇستاۋ ءتيىمسىز. وسىعان بايلانىستى تال ەگىپ، ساياباق اشۋعا شەشىم قابىلداندى. ال ناۋرىز مەيرامى اياسىنداعى شارالارعا ستەللانىڭ جانىنداعى اشىق الاڭ دا جەتكىلىكتى.