كوپبالالى وتباسىلارعا جەڭىلدەتىلگەن كرەديت بەرۋ جۇيەسى ەنگىزىلەدى - رومان سكليار
بۇل تۋرالى بۇگىن ۇكىمەت وتىرىسىندا «نۇرلى جەر» باعدارلاماسى بويىنشا بايانداما جاساعان ق ر يندۋستريا جانە ينفراقۇرىلىمدىق دامۋ ءمينيسترى رومان سكليار ايتتى، دەپ حابارلايدى قازاقپارات ءتىلشىسى.
«مەملەكەت باسشىسىنىڭ «Nur Otan» پارتياسىنىڭ سەزىندە بەرگەن تاپسىرمالارىن ىسكە اسىرۋ بويىنشا تۇرعىن ءۇي قۇرىلىس جيناق بانكى ارقىلى كوپبالالى وتباسىلار، مۇگەدەك بالالارى بار نەمەسە مۇگەدەك بالا تاربيەلەپ وتىرعان وتباسىلار جانە تولىق ەمەس وتباسىلارعا 20 جىلعا دەيىن العاشقى جارناسى 10 پايىز بولاتىن جىلدىق ستاۆكاسى 2 پايىزدىق جەڭىلدەتىلگەن كرەديت بەرۋ جۇيەسىن ەنگىزۋ ۇسىنىلادى. العاشقى جارنا رەتىندە تۇرعىن ءۇي سەرتيفيكاتىن پايدالانۋعا مۇمكىندىك بار»، - دەدى ول.
ءمينيستردىڭ ايتۋىنشا، اتالعان مەحانيزمدى 3 جىل ىشىندە ىسكە اسىرۋ ءۇشىن جىل سايىن 50 ميلليارد تەڭگەدەن 150 ميلليارد تەڭگە قاجەت بولادى.
«جىل سايىن 6 مىڭ نەسيە بەرۋ جوسپارلانعان. سونىمەن قاتار، اكىمدىكتەر تاراپىنان 2 مىڭ پاتەر ساتىپ الۋ قامتاماسىز ەتىلەدى. 3 رەتتىك اينالىم ەسەبىنەن 25 جىلدا 56 مىڭ كوپبالالى وتباسىعا زايم بەرىلەدى»، - دەدى رومان سكليار.