جەكە تۇرعىن ءۇي قۇرىلىسىندا ورتاق ساۋلەتتىك كەلبەتتى قولدانۋ كەرەك - اسقار مامين

استانا. قازاقپارات - جەكە تۇرعىن ءۇي قۇرىلىسىندا ورتاق ساۋلەتتىك كەلبەتتى بەلسەندى قولدانۋ كەرەك. بۇل تۋرالى بۇگىن «نۇرلى جەر» باعدارلاماسى قارالعان ۇكىمەت وتىرىسىندا پرەمەر- مينيستر اسقار مامين ايتتى، دەپ حابارلايدى قازاقپارات ءتىلشىسى.

«نۇرلى جەر» جانە «7-20-25» باعدارلامالارى - حالىقتىڭ تۇرعىن ءۇي جاعدايىن جاقسارتۋ جونىندەگى ەلباسىنىڭ الەۋمەتتىك ساياساتىنىڭ نەگىزى. وسى رەتتە بۇل باعدارلامالاردى ودان ارى ىسكە اسىرۋ ءۇشىن ءبىرقاتار ماسەلەگە نازار اۋدارۋ قاجەت. ەڭ الدىمەن، تۇرعىن ءۇي قۇرىلىسىن دامىتۋ. بيىل 13,1 ميلليون شارشى مەتر پاتەردى پايدالانۋعا بەرۋ كوزدەلىپ وتىر»، - دەدى ۇكىمەت باسشىسى.

وسى رەتتە پرەمەر- مينيستر اكىمدىكتەر جانە ءتيىستى مەملەكەتتىك ورگاندار جەر تەلىمدەرىن ءبولۋ، ينجەنەرلىك- كوممۋنالدىق ينفراقۇرىلىمدى سالۋ، سونىمەن قاتار ينۆەستيتسيالىق تۇرعىن ءۇي جوبالارىن سۇيەمەلدەۋ بويىنشا جۇمىس قارقىنىن ارتتىرۋ قاجەتتىگىنە نازار اۋدارتتى.

 «مەملەكەت باسشىسىنىڭ تاپسىرماسىنا سايكەس جەكە تۇرعىن ءۇي قۇرىلىسىندا ورتاق ساۋلەتتىك كەلبەتتى بەلسەندى قولدانۋ كەرەك. بۇل تاپسىرما تەك ءۇش وڭىردە ورىندالعان: اقتوبە، سولتۇستىك قازاقستان جانە قوستاناي وبلىستارى. ال قالعان وڭىرلەردە بۇل باعىتتاعى جۇمىس ەندى باستالىپ جاتىر. سوندىقتان دا وسى جۇمىستىڭ قارقىنىن ءوسىرۋ كەرەك»، - دەدى اسقار مامين.

اۆتور: مارلان جيەمباي