ءبىلىم ءمينيسترى «ناۋرىز كانيكۋلىن» ەنگىزۋگە قاتىستى پىكىر ءبىلدىردى
«مىسالى، كۇنتىزبەلىك جاڭا جىل - 1- قاڭتار ءوزىنىڭ مىقتى يدەولوگياسىمەن، سان الۋان بەلگىلەرىمەن وتباسىلىق مەرەكەگە اينالعانى ءمالىم. بۇل ورايدا، ستۋدەنتتەر مەن وقۋشىلاردىڭ ۇلتتىق مەيرامدى وتباسىندا، جاقىندارىنىڭ جانىندا قارسى الۋعا مۇمكىندىك تۋعىزۋ ماقساتىندا 14-23- ناۋرىز ارالىعىندا (10 كۇن) ناۋرىز دەمالىسى بەلگىلەنۋى ءتيىس. بۇل جەردە مەكتەپ وقۋشىلارىنىڭ بۇرىنعى 24- ناۋرىز بەن 1- ءساۋىر ارالىعىنداعى 3- توقسان دەمالىسى ون كۇنگە جىلجىپ، ولار وسى ناۋرىز مەيرامىن وتباسىمەن، اعايىن-تۋمالارىمەن قارسى الۋعا مۇمكىندىك الار ەدى»، - دەپ جازدى ا. مۇحامەدي ۇلى الەۋمەتتىك جەلىدەگى پاراقشاسىندا.
ونىڭ سوزىنە قاراعاندا، ون كۇندىك دەمالىستى بەرى قاراي جىلجىتسا، III جانە IV توقساننىڭ تەپە-تەڭدىگىن دە ساقتاۋعا مۇمكىندىك بار. ماسەلەن، III توقسان 10- قاڭتار مەن 24- ناۋرىز ارالىعىنداعى 74 كۇندى قامتيدى، ال IV توقسان 1- ءساۋىر مەن 24- مامىردى الىپ وتىر. ول - 54 كۇن. جاڭا نۇسقا بويىنشا وقۋشىلار مەن ستۋدەنتتەردىڭ 10 كۇندىك دەمالىسى بەرى قاراي جىلجىپ، 14-24- ناۋرىزعا كەلسە، Ⅲ توقسان (64 كۇن) جانە 4- توقسان (61 كۇن) تەڭەسەدى. ال قازاقستاندىقتار ناۋرىز مەيرامىن جاڭاشا تويلاي الادى.
ق ر ءبىلىم جانە عىلىم ءمينيسترى كۇلاش ءشامشيدينوۆانىڭ ايتۋىنشا، اتالعان ماسەلەنى جان-جاقتى زەردەلەۋ كەرەك. سەبەبى وقۋ باعدارلاماسىنا سايكەس، ءاربىر توقساننىڭ ءوز جوسپارى بار.
«ءبىز ونى ءالى قاراعان جوقپىز، قاراۋىمىز قاجەت. 10 كۇندى جىلجىتۋ بولعانىمەن بىزدە ناقتى وقۋ باعدارلاماسى بار. ال III توقساننىڭ جوسپارىن اياقتاۋ قاجەت. ەگەر ونى وزگەرتەتىن بولساق، وقۋ باعدارلاماسىنىڭ ماتەريالىن II توقسانعا كوتەرۋىمىز كەرەك، نەمەسە IV توقسانعا ءتۇسىرۋىمىز كەرەك. سول سەبەپتى ونىڭ ءبارىن قاراماي، قازىر بىردەن اۋىستىرا سالامىن دەپ، ەشكىم ايتا المايدى. وقۋ باعدارلاماسىن ءاربىر سىنىپ بويىنشا قاراۋ قاجەت. ءاربىر سىنىپتىڭ باعدارلاماسىن جەكە-جەكە قاراۋىمىز كەرەك»، - دەدى ك. ءشامشيدينوۆا قازاقپارات تىلشىسىنە بەرگەن سۇحباتىندا.