اسقار مامين كوپبالالى وتباسىلارعا پاتەر قاي ۋاقىتتان بەرىلە باستايتىندىعىن ايتتى

استانا. قازاقپارات - الداعى ەكى جىلدا 22,5 مىڭ وتباسى 2 پايىزدىق تۇرعىن ءۇي نەسيەسىن الادى. بۇل تۋرالى بۇگىن «نۇرلى جەر» باعدارلاماسى قارالعان ۇكىمەت وتىرىسىندا ق ر پرەمەر-ءمينيسترى اسقار مامين ايتتى، دەپ حابارلايدى قازاقپارات ءتىلشىسى.

اسقار مامين مەملەكەت باسشىسىنىڭ تاپسىرماسى بويىنشا «نۇرلى جەر» باعدارلاماسىنا وزگەرىستەر ەنگىزۋ قاجەتتىگىن اتاپ ءوتتى.

«ەلباسىنىڭ الەۋمەتتىك قامقورلىق شارالارىن ىسكە اسىرۋ اياسىندا 5 جىلدىڭ ىشىندە جىل سايىن 6 مىڭعا جۋىق كوپبالالى وتباسى ۇيمەن قامتاماسىز ەتىلەدى. 1- مامىردان باستاپ پاتەر ءبولۋدى باستايمىز»، - دەدى ول.

سونىمەن پرەمەر-مينيستر ەلباسىنىڭ تاپسىرماسىنا سايكەس مۇقتاج وتباسىلارعا تۇرعىن ءۇي نەسيەلەرى تۇرعىن ءۇي قۇرىلىس جيناق بانكى جۇيەسى ارقىلى بەرىلەتىندىگىن ايتتى.

«ەكى جىلدا 22,5 مىڭ وتباسى جەڭىلدىكپەن نەسيە الادى»، - دەدى ۇكىمەت باسشىسى.