كوپبالالى وتباسىلارعا دايىن ۇيلەردى الىپ بەرۋگە قوماقتى قارجى ءبولىندى
بۇل تۋرالى بۇگىن ۇكىمەت وتىرىسىندا «نۇرلى جەر» باعدارلاماسى بويىنشا بايانداما جاساعان ق ر يندۋستريا جانە ينفراقۇرىلىمدىق دامۋ ءمينيسترى رومان سكليار ايتتى، دەپ حابارلايدى قازاقپارات ءتىلشىسى.
«جاپپاي تۇرعىن ءۇي قۇرىلىسى ءجۇرىپ جاتقان اۋداندارعا ينجەنەرلىك جەلىلەردى سالۋ ءۇشىن بيىل 81,7 ميلليارد تەڭگە ءبولۋ قاراستىرىلىپ وتىر. وڭىرلەردى قارجىلاندىرۋدى باستاپ كەتتىك. ساتىپ الۋ قۇقىعىنسىز جالعا بەرىلەتىن تۇرعىن ۇيلەردىڭ قۇرىلىسى ءۇشىن وڭىرلەرگە رەسپۋبليكالىق بيۋدجەتتەن 32,8 ميلليارد تەڭگە قاراستىرىلعان. شامامەن 4,5 مىڭ پاتەردىڭ قۇرىلىسى جوسپارلانۋدا»، - دەدى مينيستر.
ونىڭ ايتۋىنشا، ەلباسىنىڭ «نۇر وتان» پارتياسىنىڭ XⅧسەزىندە بەرگەن تاپسىرمالارىن ىسكە اسىرۋ ءۇشىن 2019 -جىلعا بيۋدجەتتى ايقىنداۋ اياسىندا كوپبالالى وتباسىلار ءۇشىن جالدامالى تۇرعىن ءۇيدىڭ قۇرىلىسىنا جانە ساتىپ الۋعا وڭىرلەرگە 50 ميلليارد تەڭگە ءبولۋ قاراستىرىلعان.
«جالپى اتالعان ءىس- شاراعا 7 جىل ىشىندە 350 ميلليارد تەڭگە قاراستىرىلعان. بۇل جىل سايىن 6 مىڭ كوپبالالى وتباسىنى پاتەرمەن قامتاماسىز ەتۋگە مۇمكىندىك بەرەدى. ياعني، 7 جىلدا 40 مىڭنان استام پاتەر بەرىلەدى دەگەن ءسوز»، - دەدى ول.
ر. سكلياردىڭ سوزىنە قاراعاندا، بۇل ءۇشىن بۇگىن 25 ميلليارد تەڭگەنىڭ قۇرىلىس جوبالارىنىڭ ءتىزىمى جاسالعان. دايىن پاتەرلەردى ساتىپ الۋ ءۇشىن 25 ميلليارد تەڭگە قاراستىرىلعان. بۇل كوپبالالى وتباسىلاردىڭ تۇرعىن ءۇي ماسەلەلەرىن شەشۋدى تەزدەتۋگە ىقپال ەتەدى. ليميت سوماسى وڭىرلەردەگى اكىمدىكتەردە كەزەكتە تۇرعان كوپبالالى وتباسىلاردىڭ سانىنا نەگىزدەلەدى.
«مىسالى، تۇركىستان وبلىسىندا 4832 كوپبالالى وتباسى كەزەكتە تۇر. وسىعان بايلانىستى وڭىرگە پروپورتسيونالدى 8,6 ميلليارد تەڭگە بولىنۋدە. بۇل قاراجاتتان 4,3 ميلليارد تەڭگە قۇرىلىسقا، قالعان 4,3 ميلليارد تەڭگە دايىن پاتەر ساتىپ الۋعا بەرىلەدى. سولتۇستىك قازاقستان وبلىسىنداعى 342 وتباسىعا بەرىلەتىن ليميت 700 ميلليون تەڭگەنى قۇرايدى»، - دەدى مينيستر.
اۆتور: مارلان جيەمباي