استانادا قۇرامىندا زياندى قوسپاسى بار كەسپە ساتىلىمنان الىنىپ تاستالدى

استانا. قازاقپارات - استانا قالاسى قوعامدىق دەنساۋلىق ساقتاۋ دەپارتامەنتىنىڭ باسشىسى سادۋاقاس بايعابىلوۆ قۇرامىندا گەندىك-موديفيكاتسيالانعان اعزالار (گ م ا) بار ونىمدەرگە جۇرگىزىلگەن تەكسەرۋدىڭ ناتيجەسىن جاريا ەتتى، دەپ حابارلايدى قازاقپارات ەلوردا ينفوعا سىلتەمە جاساپ.

«ەلوردانىڭ ساۋدا جەلىسىندە كورەيا رەسپۋبليكاسىندا جاسالعان «كليار. سىزدەردىڭ تاماقتارىڭىزعا ارنالعان قىتىرلاق، ءدامدى قابىقشا» جانە «يۋككەديان» تەز ازىرلەنەتىن كەسپە» ونىمدەرىنىڭ قۇرامىندا گ م ا رۇقسات ەتىلەتىن نورماتيۆتەردىڭ شەگىنەن اسىپ كەتكەن. سونىمەن قاتار، سىرتقى ورامىندا گ م ا- نىڭ بار ەكەندىگى تۋرالى اقپارات كورسەتىلمەگەن»، - دەلىنگەن حابارلامادا.

استانا قالاسىنىڭ ساۋدا جەلىلەرىنە جۇرگىزىلگەن تەكسەرۋ ناتيجەسى بويىنشا 219 ورامداعى 109,5 كەلى كولەمدە «كليار» جانە 40 ورامداعى 3,6 كەلى كولەمدە «كەسپە» ساتۋدان الىندى. كاسىپكەرلەرگە ەكى تاۋار بويىنشا 20 ا ە ك كولەمىندە ايىپپۇل سالىندى.

ايتا كەتەرلىگى، بۇعان دەيىن دە «يۋككەديان» تەز ازىرلەنەتىن كەسپەسىن ساۋدالاعان كاسىپكەر اكىمشىلىك جاۋاپكەرشىلىككە تارتىلعان بولاتىن.