الماتى وبلىسىندا «جەتىسۋ» راديوسى اشىلادى

تالدىقورعان. قازاقپارات - الماتى وبلىستىق «جەتىسۋ» تەلەاراناسىنىڭ نەگىزىندە وبلىستىق «جەتىسۋ» راديوسى اشىلاتىن بولدى.

بۇل تۋرالى وڭىرلىك كوممۋنيكاتسيالار قىزمەتىندەگى بريفينگتە تەلەارنا باسشىسى بەيسەن قۇرانبەك ايتتى، دەپ حابارلايدى قازاقپارات ءتىلشىسى.

بيىل وبلىستىق «جەتىسۋ» تەلەارناسىنىڭ قۇرىلعانىنا 20 جىل. مەرەي توي اياسىندا كوپتەگەن شارالار جوسپارلانىپ وتىر. بەيسەن قۇرانبەك سولاردىڭ ءبىرازىن تىزبەكتەپ بەردى. ارنا تاريحىندا ەڭ اۋقىمدى قادام وبلىستىق راديو اۋە تولقىنىنا شىعادى. قازىرگى تاڭدا جيىلىككە بايقاۋ جاريالانىپ، ناتيجەسىن كۇتۋدەمىز دەيدى، باس ديرەكتور.

وسى ۋاقىتقا دەيىن بىرنەشە كوركەم فيلم ءتۇسىرىپ ۇلگەرگەن شىعارماشىلىق ۇجىم ارنا جانىنان كينو ءبولىمىن اشۋدى دا جوسپارلاپ وتىر. ال مەرەيلى داتا مادەني-كوپشىلىك، سپورتتىق شارالارمەن، قايىرىمدىلىق اكسيالارىمەن ەستە قالماق. ناۋرىز مەرەكەسىندە اسىق اتۋ، ارقان تارتۋ، لاڭگى تەبۋ سىندى ۇلتتىق ويىنداردان وبلىستىق ب ا ق وكىلدەرى اياسىندا جارىستار ۇيىمداستىرىلادى. سونداي-اق رەسپۋبليكالىق دەڭگەيدە فۋتبولدان تۋرنير وتەدى. ءداستۇرلى انشىلەردىڭ كونسەرتىن، «بولمىس» توك-شوۋىنىڭ قايىرىمدىلىق كونسەرتىن وتكىزۋ جوسپارلانعان. ءار جىلدارى «جەتىسۋ» تەلەارناسىندا ەڭبەك ەتىپ، زەينەتكە شىققان ارداگەرلەرگە قۇرمەت كورسەتىلىپ، ارنا تاريحىنان سىر شەرتەتىن كىتاپ جارىققا شىعادى. 20 جىلدا «جەتىسۋ» تەلەارناسى كاسىبي مامانداردى دايارلايتىن ۇلكەن مەكتەپكە اينالدى.

«ءبىزدىڭ «جەتىسۋ» تەلەارناسىنىڭ 20 جىلدىعىن اتاپ وتۋدەگى ماقسات، بۇل وسى جىلدار ىشىندە قول جەتكىزگەن جەتىستىكتەرىمىزبەن، تابىستارىمىزبەن، ءوزىمىزدىڭ پاتشا كوڭىلدى كورەرمەندەرمەن ءبولىسۋ. سولارمەن بىرگە الدىعا جاڭا ماقساتتار، جاڭا مەجەلەردى انىقتاپ، سوعان جەتۋدىڭ جولدارىن قاراستىرۋ»، - دەپ اتاپ ءوتتى بەيسەن قۇرانبەك.