شىمكەنت كوشەلەرىنەن «ناۋرىز كەرۋەنى» ءجۇرىپ ءوتتى

None
None
شىمكەنت. قازاقپارات - شىمكەنتتە - «ناۋرىز كەرۋەنى» ءىس-شاراسى ءوتتى، دەپ حابارلايدى قازاقپارات ءتىلشىسى.

اتالعان شاراعا زيالى قاۋىم وكىلدەرى مەن اتا-اجەلەر، ەتنومادەني بىرلەستىكتەردىڭ وكىلدەرى، مەن تەاتر ارتىستەرى جانە جاستار قاتىستى. تىزبەگىندە تۇيەلەر مەن ات اربا، كۇيمەلەر مەن اۆتوكولىكتەر ءتىزىلىپ جۇرگەن كەرۋەن اۋەلى «ناۋرىز» الاڭىنا جينالدى.

بارلىعى 100 دەن اسا ادام ەنگەن كەرۋەنشىلەر وسى الاڭنان جولعا شىعىپ، قالانىڭ ورتالىق كوشەلەرىمەن ءجۇرىپ ءوتتى. جاستار جاعى اتقا وتىرسا، ارباعا مىنگەن اجەلەر مەن ونەرپازدار، ەتنومادەني بىرلەستىكتەردىڭ وكىلدەرى حالىق اندەرى مەن كۇيلەرىنەن شاشۋ شاشتى.

جول-جونەكەي باۋىرساق پەن تاتتىلەر تاراتىپ، تۇرعىندارعا مەرەكەلىك كوڭىل كۇي سىيلادى. سوڭىنان مەرەكەلىك شارا ۇيىمداستىرىلىپ، جينالعان كوپشىلىك ناۋرىز كوجەدەن ءدام تاتتى. كۇبىدەن تۇسكەن ماي مەن تابادا پىسكەن ىستىق نان، باۋىرساقتان اۋىز ءتيدى.

شارا بارىسىندا قازاقستان حالقى اسسامبلەياسى ءتوراعاسىنىڭ ورىنباسارى ءمۇراتالى قالمۇراتوۆ پەن بەلگىلى ارداگەر-جۋرناليست بايدۋللا قونىسبەك، يسامۋدين رىسباي سىندى ابىرويلى ازاماتتار جۇرتشىلىقتى ۇلىستىڭ ۇلى كۇنىمەن قۇتتىقتاپ، ىزگى نيەتتەرىن ءبىلدىردى.

«ۇلىستىڭ ۇلى كۇنى بۇگىندە ىنتىماق پەن ىرىستىڭ مەرەيلى مەرەكەسىنە اينالدى. حالىقتى بەرەكە-بىرلىككە باستاپ، ولاردى جاقسىلىق پەن مەيىرىمدىلىككە، ماحاببات پەن شاتتىققا بولەپ كەلەدى. ناۋرىزدا بارشا جۇرت وتكەنىن ەلەكتەپ، بۇگىنىن باعامداعان. رەنىشتى ۇمىتىپ، كەشىرىمشىل ءارى كەڭپەيىل بولىپ، وتكەنگە سالاۋات، بارعا قاناعات ەتكەن. اتا-بابامىزدىڭ وسىنداي ونەگەلى ءداستۇرىن قاستەرلەپ، داۋىرىمىزگە ساي ۇيلەستىرىپ دامىتۋ - اسىل پارىزىمىز»، - دەدى بايدۋللا قونىسبەك.

«بارماق بىرىكپەي، ينە ىلىكپەيدى» دەگەندەي، ەلدىڭ اۋىزبىرشىلىگى مەن ىنتىماعىن وسى ءاز-ناۋرىزدان باستاعان قالا جۇرتشىلىعى ۇلىستىڭ ۇلى كۇنىن وسىلاي باستاپ كەتتى. اعارعان اقتىقتىڭ، بال شىرىن توقتىقتىڭ بەلگىسى دەپ بىلەتىن جالپى حالىقتىق مەرەكە الداعى كۇندەرى دە كەڭ كولەمدە اتالىپ وتىلمەك.

سوڭعى جاڭالىقتار