گەننادي گولوۆكين مانسابىن قاشان اياقتايتىنىن جانە كانەلومەن ءۇشىنشى ايقاسى تۋرالى ايتتى

None
None
الماتى. قازاقپارات - تانىمال قازاقستاندىق كاسىپقوي بوكسشى، بۇرىنعى الەم چەمپيونى گەننادي گولوۆكين DAZN USA-گە بەرگەن سۇحباتىندا مانسابىن نەشە جاسىندا اياقتاۋدى جوسپارلاپ وتىرعانىن ايتتى، دەپ حابارلايدى قازاقپارات ءتىلشىسى.

تاياۋدا گولوۆكين DAZN- مەن التى ايقاسقا جوسپارلانعان ءۇش جىلدىق كەلىسىم جاسادى. ول 2021 -جىلعا دەيىن جالعاسادى.

«مەن 40 جاسىمدا توقتايتىن شىعارمىن. دەگەنمەن، بولاشاقتى ءبىلۋ مۇمكىن ەمەس... ماعان قازىر ول تۋرالى ايتۋ قيىن، ءبىراق 40 جاسىمدا پروموۋشەنىممەن ماقساتتى تۇردە اينالىسقىم كەلەدى»، - دەدى گولوۆكين سۇحباتىندا.

جۋرناليست «جۇبايىڭىز 40 جاستا جۇدىرىقتاسۋعا رۇقسات بەرەدى مە؟» دەپ سۇرادى.

«ونىڭ ورنىنا جاۋاپ بەرۋ قيىن، سەبەبى ءبىز ونىمەن مۇنى دۇرىستاپ تالقىلاعان جوقپىز. ءبىراق، 40 جاستا ءوزىڭنىڭ الدىڭداعى ەمەس، وتباسىڭنىڭ الدىنداعى جاۋاپكەرشىلىكتى سەزىنۋىڭ كەرەكسىڭ عوي»، - دەدى قازاقستاندىق بوكسشى.

گولوۆكين اڭگىمەلەسۋ بارىسىندا DAZN- مەن سەرىكتەستىك تۋرالى ايتتى.

«ءبىزدىڭ دامىعىمىز كەلەتىن باعىتىمىز ءبىر. قازىرگى ۋاقىتتا سەرىكتەسپىز، مەنىڭ بولاشاعىم جانە مەنىڭ پروموۋشەنىمنىڭ بولاشاعى ءۇشىن DAZN- مەن جۇمىس ىستەگەنىم جاقسى بولادى»، - دەدى گەننادي گولوۆكين.

قازاقستاندىق بوكسشى كانەلومەن ءۇشىنشى ايقاستىڭ مۇمكىندىگىنە قاتىستى پىكىر ءبىلدىردى.

«ەكەۋمىز ءۇشىن دە، جانكۇيەرلەر ءۇشىن دە بۇل وتە ماڭىزدى. ەگەر ولار وسى جەكپە-جەكتى كورگىلەرى كەلسە، ەگەر شىنىمەن قىزىعۋشىلىق تۋسا، بۇل ايقاس بولادى»، - دەدى گ. گولوۆكين.

 

سوڭعى جاڭالىقتار