استاناداعى كوپبالالى وتباسىلارعا ارزان باسپانا بەرىلەدى

استانا. قازاقپارات - ق ر يندۋستريا جانە ينفراقۇرىلىمدىق دامۋ مينيسترلىگى استاناداعى كوپبالالى وتباسىلارعا بەرىلەتىن ارەندالىق پاتەرلەردىڭ سانىن جاريالادى، دەپ حابارلايدى قازاقپارات ءتىلشىسى.

قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ ءتوراعاسى مارحابات جايىمبەتوۆتىڭ ايتۋىنشا، بۇگىندە رەسپۋبليكا بويىنشا 340000 كوپبالالى وتباسى بار. سونىڭ ىشىندە 28126 وتباسى باسپانا كەزەگىندە تۇر. ال استانا قالاسىندا 2888 كوپبالالى انا رەسمي كەزەككە تىركەلگەن.

«ەلوردادا كوپبالالى وتباسىلارعا باسپانا سالۋ ءۇشىن جىل سايىن 5,1 ميلليارد تەڭگە بولىنەتىن بولادى. ول جىلدا 616 پاتەر سالىنادى دەگەن ءسوز. ال جەتى جىلدىڭ ىشىندە 35,9 ميلليارد تەڭگەنىڭ بولىنەتىنىن ەسكەرسەك، ەلوردادا 4107 پاتەر سالىنادى. بۇل - جالعا بەرىلەتىن ارەندالىق ۇيلەر»، - دەدى م. جايىمبەتوۆ استاناداعى كوپبالالى انالارمەن بولعان كەزدەسۋدە.

كوميتەت باسشىسىنىڭ سوزىنە قاراعاندا، جەتى جىلدىڭ ىشىندە رەسپۋبليكا بويىنشا ارەندالىق پاتەر قۇرىلىسىنا 350 ميلليارد تەڭگە بولىنەدى. سونىڭ ارقاسىندا 42000 پاتەر سالىنادى دەگەن جوسپار بار.

«قازىر ايماقتار اراسىندا كەزەكتە تۇرعان كوپبالالى وتباسىلاردىڭ سانى جاعىنان استانا تۇركىستان مەن الماتى وبلىستارىنان كەيىن تۇر. بۇل دەگەنىمىز، رەسمي تۇردە كەزەكتە تۇرعان ازاماتتاردىڭ 10,3 پايىزى استانادا تۇرادى. اعىمداعى جىلى مامىر ايىندا رەسپۋبليكا بويىنشا 2000 ارەندالىق پاتەر كوپبالالى وتباسىلارعا بەرىلەتىن بولادى. سونىڭ ىشىندە استانا قالاسىندا 150-200 ارەندالىق پاتەر تاراتىلادى دەگەن جوسپارىمىز بار»، - دەپ اتاپ كورسەتتى م. جايىمبەتوۆ.

بۇعان دەيىن قازاقپارات ءتىلشىسى قازاقستانداعى جالدامالى پاتەرلەر قۇرىلىسىن زەردەلەپ، كوپبالالى وتباسىلارعا ارنالعان باسپانانى جالعا بەرۋدىڭ ەسەپ-قيسابىن ساراپتاپ شىققان بولاتىن. ونداي باسپانانىڭ ءبىر ايلىق تولەماقىسى شامامەن 7-9 مىڭ تەڭگە بولادى دەگەن بولجام دا بار.

ايتا كەتەيىك، بۇگىن ق ر يندۋستريا جانە ينفراقۇرىلىمدىق دامۋ مينيسترلىگى كوپبالالى وتباسىلارعا 2 پروتسەنتتىك يپوتەكانى بەرۋ شارتتارىن جاريالادى. تۇرعىن ءۇي قۇرىلىس جيناق بانكىنەن 8 ميلليون تەڭگە قارىزعا الىنسا، العاشقى 8 جىلدا اي سايىن 42000 تەڭگەدەن تولەۋ كەرەك. ال ودان كەيىنگى 11 جىلدا اتالعان سوما 27000 تەڭگەگە دەيىن تومەندەيدى.

«جەڭىلدەتىلگەن باسپانا نەسيەسىنە جاڭا پاتەر، بولماسا، ءۇي ساتىپ الۋعا بولادى. جىلدىق مولشەرلەمەسى - 2 پروتسەنت. ول 19 جىلعا بەرىلەدى. سوسىن 10 پايىز كولەمىندە العاشقى جارنا سالۋ قاجەت. ەندى، العاشقى جارناعا اقشا جوق دەگەن ماسەلە تۋىندايدى. ماسەلەن، 10 ميلليون تەڭگەنى قارىزعا الساڭ، 1 ميلليون تەڭگە كولەمىندە العاشقى جارنا قاجەت. ءبىز بۇل ماسەلەنى بىلاي شەشۋدى كوزدەپ وتىرمىز. اكىمدىكتەر بەرەتىن تۇرعىن ءۇي كۋالىكتەرى ارقىلى، بولماسا، ءىرى كاسىپورىنداردىڭ كومەگىمەن العاشقى جارنانى الۋعا بولادى. ماسەلەن، استانا قالاسى تۇرعىن ءۇي كۋالىكتەرىنە 2 ميللياردتان استام قارجى بولەمىز دەپ وتىر. سونىڭ كومەگىمەن الۋعا بولادى»، - دەيدى م. جايىمبەتوۆ.

ونىڭ ايتۋىنشا، جەڭىلدەتىلگەن يپوتەكانى باي-اۋقاتتى ادامدار الىپ كەتپەس ءۇشىن 2 پروتسەنتتىك يپوتەكا بويىنشا جالاقىنىڭ شەكتى مولشەرى بەكىتىلدى.

تۇتىنۋشىلىق كرەديتى بار وتباسىلارعا دا جەڭىلدەتىلگەن تۇرعىن ءۇي نەسيەسى بەرىلەدى.