قوعامدى ماسىلدىق مەڭدەپ بارا جاتقان سياقتى - سەناتور
مۇنداي پىكىردى بۇگىن سەناتتاعى ەلباسىنىڭ ازاماتتاردى الەۋمەتتىك قورعاۋ بويىنشا بەرگەن تاپسىرمالارىنىڭ ورىندالۋى قارالعان ۇكىمەت ساعاتىندا سەناتور سارسەنباي ەڭسەگەنوۆ ءبىلدىردى، دەپ حابارلايدى قازاقپارات ءتىلشىسى.
«دەگەنمەن، ونىڭ ەكى ۇلكەن ماسەلەسى بار، ءبىرى - ماسىلدىق. شىن مانىندە سوڭعى كەزدەرى وسى ماسەلە ەتەك الىپ بارا جاتقانداي اسەر قالدىرادى. جاقىندا وتكەن كەزدەسۋدە انىقتالعانى - ۇلكەن جولدىڭ بويىندا سالىنىپ جاتقان مەكتەپ قۇرىلىسىنداعى جۇمىسشىلاردىڭ 90 پايىزدان استامى وزبەك مەملەكەتىنىڭ ازاماتتارى. قۇرىلىس مەكەمەسىنىڭ باسشىسى سول اۋىلدىڭ تۇرعىنى. ول كىسىنىڭ ايتۋىنشا، جەرگىلىكتى تۇرعىندار جۇمىسقا كەلمەيدى. قارا جۇمىسشىنىڭ ايلىعى 90 مىڭ تەڭگە، سىلاقشى ماماندار 150 مىڭ تەڭگە الادى. مۇنداي اقشاعا جەرگىلىكتى تۇرعىنداردىڭ جۇمىس جاساۋعا ىقىلاسى جوق. كەيبىرەۋلەرى «مۇنداي جالاقىعا جۇمىسقا بارساق، جاردەماقىدان قاعىلامىز» دەگەن ءۋاج ايتادى ەكەن»، - دەدى ول.
سوندىقتان سەناتور بۇل ۇلكەن ماسەلەگە اينالىپ تۇرعاندىعىن ايتا كەلە قول- اياعى ساۋ ادامدارعا قاتىستى قولدانىستاعى زاڭنامالىق اكتىلەردى قايتادان قاراپ، مۇمكىن تالابىن كۇشەيتكەن دۇرىس شىعار دەگەن ويىن جەتكىزدى.
«ال تۇرعىندار مۇنداي جاعدايدىڭ قالىپتاسۋىنا ءبىزدىڭ بيزنەستىڭ ىقىلاس- نيەتىنىڭ جوقتىعىنان ەكەنىن ايتادى. سەبەبى بيزنەس ءۇشىن شەتەلدەن كەلگەن وزبەك ازاماتتارىن جۇمىسقا الۋ ءتيىمدى. ولار كۇنى- ءتۇنى جۇمىس جاسايدى. ولارعا ارتىق جۇمىس جاساعانى ءۇشىن تولەم جاساۋدىڭ، الەۋمەتتىك تولەمدەر تولەۋدىڭ نەمەسە ەڭبەككە جارامسىزدىق تولەمىن تولەۋدىڭ قاجەتى جوق. جەرگىلىكتى تۇرعىندارمەن بيزنەس وكىلدەرى اراسىندا دۇرىس كەلىسىمشارت جاسالمايدى. «ەڭبەك زاڭى نەگىزىنەن جۇمىس بەرۋشىنىڭ قۇقىعىن كوزدەپ كەتتى، جۇمىسشىلاردىڭ قۇقىعى شەكتەۋلى» دەگەن اڭگىمەلەر دە ايتىلۋدا. مۇنى بولاشاقتا زەردەلەپ قاراۋ كەرەك دەگەن ويدامىن»، - دەدى سارسەنباي ەڭسەگەنوۆ.