ەكى پروتسەنتتىك يپوتەكانى اۋقاتتىلار الىپ كەتپەي مە

استانا. قازاقپارات - پرەزيدەنتتىڭ تاپسىرماسى بويىنشا اتاعان تۇرعىن ءۇي نەسيەسى كوپبالالى، مۇگەدەك بالاسى بار مەن تولىق ەمەس وتباسىلارعا عانا بەرىلۋى شارت.

ق ر يندۋستريا جانە ينفراقۇرىلىمدىق دامۋ مينيسترلىگى مەن تۇرعىن ءۇي قۇرىلىس جيناق بانكى اتالعان يپوتەكانىڭ نەگىزگى شارتتارىن جاريالادى، دەپ حابارلايدى قازاقپارات ءتىلشىسى.

قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ ءتوراعاسى مارحابات جايىمبەتوۆتىڭ ايتۋىنشا، جەڭىلدەتىلگەن يپوتەكانى باي-اۋقاتتى ادامدار الىپ كەتپەس ءۇشىن 2 پروتسەنتتىك يپوتەكا بويىنشا جالاقىنىڭ شەكتى مولشەرى بەكىتىلدى.

«قازىر بۇكىلىن بايلار الىپ كەتەدى دەگەن سۇراقتار دا بار. بايلىعى كوپ ازاماتتار الىپ كەتپەس ءۇشىن ءبىر ادامعا شاققاندا مينيمالدى جالاقى - 42500 تەڭگەدەن اسپاۋى كەرەك. مىسالى، وتباسىدا ەكى ادام بولسا، ولاردىڭ ايلىق تابىسى 85500 تەڭگەدەن اسپاۋى قاجەت. ال التى ادام بولسا، 255000 مىڭ تەڭگەدەن اسپاۋى ءتيىس»، - دەدى م. جايىمبەتوۆ بۇگىن استاناداعى كوپبالالى انالارمەن بولعان كەزدەسۋدە.

ايتا كەتەيىك، بۇگىن ق ر يندۋستريا جانە ينفراقۇرىلىمدىق دامۋ مينيسترلىگى كوپبالالى وتباسىلارعا 2 پروتسەنتتىك يپوتەكانى بەرۋ شارتتارىن جاريالادى. تۇرعىن ءۇي قۇرىلىس جيناق بانكىنەن 8 ميلليون تەڭگە قارىزعا الىنسا، العاشقى 8 جىلدا اي سايىن 42000 تەڭگەدەن تولەۋ كەرەك. ال ودان كەيىنگى 11 جىلدا اتالعان سوما 27000 تەڭگەگە دەيىن تومەندەيدى.

«جەڭىلدەتىلگەن باسپانا نەسيەسىنە جاڭا پاتەر، بولماسا، ءۇي ساتىپ الۋعا بولادى. جىلدىق مولشەرلەمەسى - 2 پروتسەنت. ول 19 -جىلعا بەرىلەدى. سوسىن 10 پايىز كولەمىندە العاشقى جارنا سالۋ قاجەت. ەندى، العاشقى جارناعا اقشا جوق دەگەن ماسەلە تۋىندايدى. ماسەلەن، 10 ميلليون تەڭگەنى قارىزعا الساڭ، 1 ميلليون تەڭگە كولەمىندە العاشقى جارنا قاجەت. ءبىز بۇل ماسەلەگە بىلاي شەشۋدى كوزدەپ وتىرمىز. اكىمدىكتەر بەرەتىن تۇرعىن ءۇي كۋالىكتەرى ارقىلى، بولماسا، ءىرى كاسىپورىنداردىڭ كومەگىمەن العاشقى جارنانى الۋعا بولادى. ماسەلەن، استانا قالاسى تۇرعىن ءۇي كۋالىكتەرىنە 2 ميللياردتان استام قارجى بولەمىز دەپ وتىر. سونىڭ كومەگىمەن الۋعا بولادى»، - دەيدى م. جايىمبەتوۆ.

كوميتەت باسشىسىنىڭ سوزىنە قاراعاندا، جەڭىلدەتىلگەن كرەديتتىڭ ەڭ جوعارى سوماسى - 15 ميلليون تەڭگە الىنسا، ول وتباسىنىڭ تابىسى 104250 تەڭگە بولۋى قاجەت. ال 6 ميلليون تەڭگەنىڭ قارىزىنا 56850 تەڭگەنىڭ جالاقىسى كەرەك.

 «مىسالى، 6 ميلليون تەڭگەنىڭ نەسيەسىن الساڭىز، وندا العاشقى 8 جىلدا اي سايىن 31600 تەڭگەنى تولەيسىز. ودان كەيىنگى 11 جىلدا 18988 تەڭگە تولەپ وتىرۋ قاجەت. بۇعان ءتورت بالادان كوپ وتباسىلار قاتىسا الادى. سوسىن مۇگەدەك بالالارى بار وتباسىلار مەن تولىق ەمەس وتباسىلارعا الۋعا مۇمكىندىك بار»، - دەپ اتاپ كورسەتتى م. جايىمبەتوۆ.