نۇرسۇلتان نازاربايەۆ استانانىڭ بولاشاق باس مەشىتىنىڭ ىرگەتاسىن قالاۋ راسىمىنە قاتىستى

استانا. قازاقپارات - قازاقستان پرەزيدەنتى نۇرسۇلتان نازاربايەۆ استانانىڭ باس مەشىتىنىڭ قۇرىلىس ورنىنا تاس قويدى، دەپ حابارلايدى قازاقپارات ءتىلشىسى.

بۇل نىسان ەكسپو-قالاشىقتىڭ جانىنداعى جاڭا ساياباق اۋماعىندا بوي كوتەرىپ، كولەمى بويىنشا بوتانيكالىق ساياباقتان دا ۇلكەن بولادى. قالا اكىمدىگىنىڭ دەرەگى بويىنشا، مەشىتتىڭ سىيىمدىلىعى 30 مىڭ ادام. ونى دەمەۋشىلەر سالىپ جاتىر. مەملەكەت باسشىسى نۇرسۇلتان نازاربايەۆتىڭ ايتۋىنشا، ارنايى قورعا تۇسكەن قارجىنى جيناۋعا بارلىق نيەت بىلدىرگەن قازاقستاندىقتار، سونىڭ ىشىندە كاسىپكەرلەر دە قاتىسقان.

عيماراتتىڭ جالپى اۋماعى 57 مىڭ شارشى مەتر، بيىكتىگى 130 مەتردى قۇرايدى. 3500 كولىككە ارنالعان اشىق جانە جابىق كولىك تۇراقتارى سالىنادى دەپ جوسپارلانىپ وتىر.

«بۇل تەك قۇلشىلىق ەتەتىن ورىن ەمەس، قالا قوناقتارى مەن تۋريستەر كەلەتىن ەلوردانىڭ كورىكتى نىساندارىنىڭ ءبىرى بولادى. (...) مەن تاياۋدا ب ا ءا- دە بولىپ، التىننان تۇرعىزىلعان شەيح زايد مەشىتىن كوردىم. بۇل مەشىت 3-4 جىل بۇرىن عانا اشىلسا دا، وعان جىل سايىن التى ميلليون تۋريست بارادى. (...) اللا ىسىمىزگە بەرەكە بەرسىن»، - دەدى نۇرسۇلتان نازاربايەۆ تاس ورناتۋ راسىمىندە.

پرەزيدەنت بۇل نىساننىڭ قۇرىلىس بارىسىن ءوزى باقىلايتىنىن مالىمدەدى.

«استانا 2020» قورىنىڭ اتقارۋشى ديرەكتورى نۇرجان مىڭجاساروۆ جۋرناليستەرگە بەرگەن سۇحباتىندا مەشىتتىڭ تەك ورتالىق ازيادا عانا ەمەس، بۇكىل ت م د ەلدەرىندەگى ەڭ ۇلكەن مەشىت بولاتىنىن، سونداي-اق الەمدەگى وسىنداي عيماراتتاردىڭ الىپ وندىعىنا كىرەتىنىن جەتكىزدى. ونىڭ سوزىنە قاراعاندا، مەشىت ەكى جىلدا سالىنىپ بىتەدى.

ايتا كەتەيىك، بۇگىن Vkontakte-دەگى «استانا ارحيتەكتۋراسى» توبىندا الىپ عيماراتتىڭ ۆيدەوروليگى جاريالاندى.

ەسكە سالايىق، قازىرگى ۋاقىتتا ورتالىق ازياداعى ەڭ ۇلكەن مەشىت سانالاتىن استاناداعى «ازىرەت سۇلتان» مەشىتىنىڭ اۋماعى  17700 شارشى مەتر. ونى 2012 -جىلدىڭ 6 -شىلدەسىندە اشتى.

اۆتور: دامير بايمانوۆ