ءۇيسىز-كۇيسىز جۇرگەن جاندار كىمگە بارىپ، قالاي تىركەلمەك
ول جەرگىلىكتى جەرلەردەگى جۇمىسپەن قامتۋ ورتالىقتارى، اكىمشىلىكتەر تاراپىنان ءارتۇرلى بيۋروكراتيالىق تالاپتاردىڭ كوپ بولۋى دا ماسەلە تۋىنداتىپ وتىرعانىن ايتتى.
«بۇل تالاپتار مۇقتاج جانۇيالاردىڭ الەۋمەتتىك كومەكتى دەر كەزىندە الۋىنا كەدەرگىلەر تۋعىزۋدا. سول كەدەرگىلەردىڭ ءبىر بولىگى - ۇلكەن قالالار، وبلىس ورتالىقتارى ماڭىندا شوعىرلانعان جانۇيالاردى ءتيىستى تىركەۋدىڭ رەتتەلمەۋى. ءۇيسىز-كۇيسىز جۇرگەن جاندار كىمگە بارىپ، قالاي تىركەلمەك؟ ال تىركەۋسىز ەشكىمگە ەشقانداي كومەك بەرىلمەيدى. وسىنى جەڭىلدەتۋ ءۇشىن قازىرگى سيفرلاندىرۋ بازاسىن رەتتەۋ، سول بازانى دۇرىس پايدالانىپ، حالىقتى باسى ارتىق قاعاز جيناۋدان ارىلتۋ كەرەك سياقتى. وسى سياقتى باسقا دا شەشىلۋى قاجەت سۇراقتار دەر كەزىندە وڭ شەشىمىن تابۋى كەرەك»، - دەدى بەكتاس بەكنازاروۆ.
ونىڭ ايتۋىنشا، جالپى سوماسى 6,5 ميلليارد دوللاردان اساتىن حالىقتى الەۋمەتتىك قولداۋعا بولىنەتىن قارجىنىڭ ادىلەتتى يگەرىلۋىن قامتاماسىز ەتۋ ۇلكەن دايىندىقتى قاجەت ەتەدى.
«بۇل ۇرانداتىپ وتكىزە سالاتىن ءبىر رەتتىك شارا ەمەس، حالىققا ۇدايى تۇردە كورسەتىلەتىن مەملەكەتتىك قىزمەت. سەنات دەپۋتاتتارى تاراپىنان بۇل جۇمىستار ءتيىستى باقىلاۋدا بولۋى قاجەت. وسى كومەكتىڭ بەرىلۋىن دايەكتى تۇردە ۇيىمداستىرىپ، ونسىز دا تۇرمىس تاپشىلىعىنان، نارىق زامانىنىڭ پارمەنىنەن شارشاعان وتباسىلاردى ءارتۇرلى بيۋروكراتتىق اۋرە-سارساڭعا سالماي، ولارعا ساپالى مەملەكەتتىك قىزمەت كورسەتۋدە سالاعا جاۋاپتى ورگانداردىڭ جۇمىسىنا ۇلكەن سىن بولماق. ۇكىمەتكە كەلەتىن بولساق، حالىقتىڭ كوكەيىندە جۇرگەن اسا ماڭىزدى الەۋمەتتىك ماسەلەلەرگە قاشاندا قىراعىلىق تانىتىپ، ۋاقىتىلى شەشىمدەر قابىلاپ، ناقتى ناتيجەگە باعىتتالعان جۇمىستار اتقارۋ مىندەتى تۇر»، - دەدى سەنات ءتوراعاسىنىڭ ورىنباسارى.