اعىلشىن تىلىندە ساباق بەرۋگە اسىقپاي كوشەمىز - كۇلاش ءشامشيدينوۆا
«بۇگىندە بارلىق ادامداردى ويلاندىرىپ جۇرگەن ماڭىزدى ءبىر ماسەلە ول - حيميا، فيزيكا، ينفورماتيكا مەن بيولوگيا پاندەرىن جوعارى كلاستا اعىلشىن تىلىندە وقىتۋ. وسىعان بايلانىستى قازىر اسىقپاۋ كوشۋ تۋرالى شەشىم قابىلدانىپ وتىر. رەسپۋبليكا بويىنشا 150-دەن ارتىق مەكتەپ ول باعدارلاماعا كوشكەن. ءبىز قازىر بۇلاردى زەردەلەپ، قاراپ وتىرمىز. وقۋشىلار نەدەن قينالىپ وتىر؟ ۇستازدار قانداي قيىندىق كورىپ جاتىر؟ ءبىز ولارعا قالاي كومەكتەسەمىز؟ سونى جان- جاقتى زەردەلەپ جاتىرمىز. سوندىقتان ۇستاز دايىن بولعان كەزدە، مەكتەپ دايىن بولعان كەزدە وزدەرىڭىزبەن كەلىسە وتىرىپ، بىرتىندەپ اعىلشىن تىلىندە وقىتۋدى ەنگىزە باستايمىز. وعان ەشكىم اسىعىپ، قۋىپ كەلە جاتقان جوق»، - دەدى ك. ءشامشيدينوۆا بۇگىن استاناداعى كوپبالالى انالارمەن بولعان كەزدەسۋدە.
وسى ورايدا مينيستر ەڭبەك نارىعىنىڭ وزگەرۋىنە بايلانىستى بىلىمگە قويىلاتىن تالاپتىڭ دا وزگەرىپ جاتقانىن ەرەكشە اتاپ ءوتتى. وسى ۋاقىتقا دەيىن مەكتەپ وقۋشىسىنا ءبىلىمدى بەرىپ، سول ءبىلىمدى قانشالىقتى مەڭگەرگەنى قارالسا، ەندىگى كەزەكتە بالا سول ءبىلىمدى ومىردە پايدالانا الا ما، جوق پا، سوعان جۇمىس ىستەۋ كەرەك.
«بۇگىندە جاڭارتىلعان ءبىلىم باعدارلاماسىن ەنگىزىپ وتىرعانىمىز دا سودان. كوپتەگەن مەملەكەتتەر ءوزىنىڭ ءبىلىم باعدارلامالارىن قايتا قاراستىرىپ جاتىر. قازاقستان دا سونىڭ ىشىندە. ايتا كەتەتىن تاعى ءبىر ماسەلە، ءبىزدىڭ بالالارعا ينفورماتيكا ءپانىن دۇرىس بەرۋ، روبوت تەxنيكاسى نەگىزدەرىمەن تانىستىرۋ كەرەك. سەبەبى تەحنولوگيالار زامانىندا ءومىر ءسۇرىپ وتىرعاننان كەيىن وسى دۇنيەلەرمەن تانىستىرۋىمىز قاجەت. «اتامەكەنمەن» بىرلەسە وتىرىپ، كاسىپكەرلىككە قاتىستى ەلەكتيۆتى كۋرستار ەنگىزۋدى تالقىلادىق. جالپى، ءبىز بالالارىمىزدى بولاشاق ۇلكەن ومىرگە دايىنداۋىمىز كەرەك»، - دەپ اتاپ كورسەتتى ك. ءشامشيدينوۆا.
ايتا كەتەيىك، بۇعان دەيىن ق ر پرەزيدەنتى نۇرسۇلتان نازاربايەۆ تا جوعارى سىنىپتاردا پاندەردى اعىلشىن تىلىندە وقىتۋ ماسەلەسىن تۇسىندىرگەن بولاتىن.
«ول كەزدە وقۋشىلار جوعارى وقۋ ورنىنا تۇسۋگە دايىندالادى. ال ءدال سول ۋاقىتتا ماتەماتيكا، فيزيكا، حيميا مەن بيولوگيانىڭ تەرميندەرىن اعىلشىن تىلىندە ءتۇسىنىپ ۇيرەنبەسە، شەتەلدە بارىپ، وقي المايدى. سوندىقتان مۇعالىمدەرگە بارىنشا تىرىسۋ كەرەك. ەندى، اعىلشىن تىلىندە ءبىر جىلدىڭ ىشىندە ۇيرەتە المايسىڭ. ال بىزدىكىلەر ءۇش ايلىق كۋرستى شىعاردى. ودان كەيىن ماتەماتيكانى اعىلشىن تىلىندە ۇيرەتەسىڭ دەيدى. ول - وتە اۋىر. مەن ءوزىم سولاي ىستەپ كوردىم. قيىن نارسە ەكەن»، - دەدى ن. نازاربايەۆ حالىقارالىق ايەلدەر مەرەكەسىنە ارنالعان جيىندا.
ال ق ر ءبىلىم جانە عىلىم ۆيتسە-ءمينيسترى تالعات ەشەنقۇلوۆ مەكتەپتە اعىلشىن تىلىندە ساباق بەرەتىن مامانداردى دايارلاۋ شارالارى تۋرالى ايتىپ بەردى.