جاڭا تاعايىندالعان باس پروكۋرور جايلى نە بىلەمىز
وسى رەتتە Tengrinews.kz ءتىلشىسى جاڭا تاعايىندالعان باس پروكۋرور جايلى مالىمەت جينادى. عيزات نۇرداۋلەتوۆ 1964 -جىلى 11 -ماۋسىمدا الماتى وبلىسىندا دۇنيەگە كەلگەن. ۇيلەنگەن، ءۇش بالاسى بار. 1986 -جىلى كيروۆ اتىنداعى قازاق مەملەكەتتىك ۋنيۆەرسيتەتىن اياقتاعان. ەڭبەك جولىن جامبىل اۋدانىندا باستاعان - پروكۋراتۋرادا تەرگەۋشى بولىپ قىزمەت اتقارعان، كەيىنىرەك پروكۋروردىڭ ورىنباسارى بولىپ تاعايىندالدى.
1990-1996 -جىلدارى پروكۋراتۋرا ورگاندارىندا جۇمىس ىستەگەن، 1996-1997 -جىلدارى ق ر مەملەكەتتىك تەرگەۋ كوميتەتى ورگاندارىندا، 1997-2007 -جىلدارى ق ر ۇلتتىق قاۋىپسىزدىك كوميتەتىندە قىزمەت ەتتى. 2007 -جىلى ۇلتتىق قاۋىپسىزدىك كوميتەتىنىڭ الماتى وبلىسى بويىنشا دەپارتامەنتىنىڭ باسشىسى بولىپ تاعايىندالدى، 2013 -جىلدىڭ 6 -مامىرىندا ۇلتتىق قاۋىپسىزدىك قىزمەتىنىڭ گەنەرال-مايورى بولدى. كەيىن 2016 -جىلدىڭ قاراشاسىندا ۇلتتىق قاۋىپسىزدىك كوميتەتىنىڭ و ق و بويىنشا دەپارتامەنتىنىڭ باسشىسى قىزمەتىنە كەلدى. 2017 -جىلدىڭ 12 -شىلدەسىندە پرەزيدەنتتىڭ بۇيرىعىمەن عيزات نۇرداۋلەتوۆ باس پروكۋروردىڭ ءبىرىنشى ورىنباسارى بولىپ تاعايىندالدى. ول وسى كۇنگە دەيىن سول قىزمەتتە بولعان ەدى. ۇلتتىق قاۋىپسىزدىك قىزمەتىنىڭ گەنەرال- مايورى اتاعىن يەلەنگەن، II دارەجەلى «ايبىن» وردەنىمەن ماراپاتتالعان.