كوپبالالى انالار ءۇشىن باسپانا كەزەگى بولەك بولادى - بەردىبەك ساپاربايەۆ

 استانا. قازاقپارات - ق ر ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆ كوپبالالى انالار ءۇشىن بولەك باسپانا كەزەگىن قۇرۋ ماسەلەسى جايىندا ايتتى، دەپ حابارلايدى قازاقپارات ءتىلشىسى.

«التىن القا» يەگەرلەرى جالپى تىزىمدە تۇرمايدى. قازىرگى كەزدە ءبىز كوپبالالى انالار ءۇشىن بولەك ءبىر كەزەكتى قۇرۋ ماسەلەسىن پىسىقتاپ جاتىرمىز. ءبىراق ونى بىردەن جاساي المايمىز عوي. ءبارىن جان- جاقتى قاراۋ قاجەت. قانشا قارجى كەرەك؟ قانشا باسپانا سالۋ كەرەك؟ سونىڭ ءبارىن جان- جاقتى قاراستىرامىز» ، - دەدى ب. ساپاربايەۆ بۇگىن استاناداعى كوپبالالى انالارمەن بولعان كەزدەسۋدە.

 ايتا كەتەيىك، جيىن بارىسىندا مينيستر كوپبالالى وتباسىلارعا بەرىلەتىن اتاۋلى الەۋمەتتىك كومەكتىڭ تاعى ءبىر جاڭالىعىن جاريالادى.

«اتاۋلى الەۋمەتتىك كومەككە كەلسەك، مەملەكەت باسشىسى ناقتى تاپسىرما بەردى، بۇرىن جانۇيانىڭ ءاربىر مۇشەسىنە تابىستى ەسەپتەگەندە (كۇنكورىس مينيمۋمنىڭ - اۆت. ) 50 پايىزدىڭ دەڭگەيىندە بولسا، ەندى ونى 70 پايىزعا كوبەيتەدى. ەگەر بۇرىن  14849 تەڭگە بولسا، 1 - ساۋىردەن باستاپ ونىڭ كولەمى  20789 تەڭگەگە كوتەرىلەدى. ال ەندى استانا قالاسىندا باسقا وڭىرلەرمەن سالىستىرعاندا ورتا جالاقى جوعارى، سوندىقتان  21698 تەڭگەگە دەيىن كوتەرىلەدى. ءبىزدىڭ بولجامىمىز بويىنشا وسى شارامەن، كەم دەگەندە، 830 مىڭ قازاقستاندىق قامتىلادى. ال استانا قالاسىندا، كەم دەگەندە،  6700 گە جۋىق» ، - دەيدى ب. ساپاربايەۆ.

ءمينيستردىڭ ايتۋىنشا، كوپبالالى وتباسىنىڭ مۇشەسى جوعارى وقۋ ورنىندا وقىسا، 21 مىڭ تەڭگەنىڭ جاردەماقىسى 23 جاسقا دەيىن تولەنەدى.

 «وسىلايشا، وسى ۋاقىتقا دەيىن جانۇيانىڭ ءاربىر مۇشەسىنە  4834 تەڭگە تولەنىپ كەلسە، 1 - ساۋىردەن باستاپ وتباسىنىڭ ءاربىر مۇشەسىنە  20789 تەڭگە تولەنەتىن بولادى. ال استانا قالاسىندا -  21698 تەڭگە. ال وتباسىداعى ەر كىسىگە جانە ايەل كىسىگە بۇرىنعىداي  10500 تەڭگە قوسىمشا تولەنەدى» ، - دەپ اتاپ كورسەتتى ب. ساپاربايەۆ.