رەسەيلىك بوكسشى فيرۋزا ءشارىپوۆانى جەڭەتىنىنە سەنىمدى

استانا. قازاقپارات - رەسەيلىك بوكسشى يۋليا كۋتسەنكو فيرۋزا ءشارىپوۆانى جەڭەتىنىنە سەنىمدى ەكەنىن ايتتى، دەپ حابارلايدى قازاقپارات ءتىلشىسى سپورتشىنىڭ باسپا ءسوز قىزمەتىنە سىلتەمە جاساپ.

«قارىمتا قايتاراتىنىما %100 سەنىمدىمىن»، - دەيدى يۋليا كۋتسەنكو.

ول ايگىلى بوكسشى روي دجونسپەن جاتتىعۋ وتكىزگەندىكتەن وزىنە دەگەن سەنىمى ارتىپ وتىر. ونىڭ ايتۋىنشا، جاتتىعۋلاردىڭ ناتيجەسىن جۇرت ءدال وسى قازاقستاندىق بوكسشىمەن بولاتىن جەكپە-جەكتەن كورە الادى.

«روي دجونسپەن بىرنەشە كۇن جاتتىعۋ جاسادىق. ول ماعان كەيبىر كومبيناتسيالاردى، اياقپەن جۇمىس ىستەۋدى، سول قولىمنىڭ حۋك سوققىسىن قولدانۋدى ۇيرەتتى. بۇدان تىس، رويدىڭ كومانداسىندا جۇمىس ىستەيتىن جولت بارنمەن ۇزاق ۋاقىت جاتتىعۋ جاسادىم. وسىنىڭ ءبارى ماعان وتە پايدالى بولدى، ونى شارىپوۆامەن وتەتىن جەكپە-جەكتە كورەسىزدەر»، - دەيدى يۋ. كۋتسەنكو.

ەسكە سالا كەتەيىك، رەسەيلىك بوكسشى يۋليا كۋتسەنكو الەم چەمپيونى فيرۋزا ءشارىپوۆاعا ريەۆانش وتكىزۋدى ۇسىنعان بولاتىن. ال WIBA، WBU، IBO Championship جانە WBC Silver بەلبەۋلەرىنىڭ يەگەرى، قازاقستاندىق فيرۋزا ءشارىپوۆا (8-1، 4 ك و) مەن رەسەيلىك يۋليا كۋتسەنكونىڭ اراسىنداعى العاشقى جەكپە-جەك وتانداسىمىزدىڭ جەڭىسىمەن اياقتالعان.