شەتەلگە ەمدەلۋگە ونكولوگيالىق اۋرۋلاردىڭ قاي تۇرلەرى باعىتتالادى
بۇگىن پارلامەنت ماجىلىسىندە وتكەن ۇكىمەت ساعاتىندا دەپۋتات كارىباي مۇسىرمان شەتەلگە ەمدەلۋگە باراتىن ونكولوگيالىق ناۋقاستار تۋرالى سۇرادى.
« كوپتەگەن قازاقستاندىقتار ءوز بويلارىندا قاتەرلى ىسىك دەرتى انىقتالعاننان كەيىن، ەمدەلۋگە شەتەلگە كەتىپ جاتادى. كوبىنەسە، وڭتۇستىك كورەياعا، قىتايعا جانە رەسەيگە بارادى. ويتكەنى ەلىمىزدە ونكولوگيالىق ناۋقاستاردى ەمدەۋدىڭ كەيبىر تيىمدىلىگى جوعارى ادىستەرى قولدانىلمايدى. مىسالى، يادرولىق جانە پروتوندى تەراپيا، سونداي- اق دونورلاردىڭ جەتىسپەۋشىلىگىنە بايلانىستى جىلىك مايىن (سۇيەك كەمىگىن) اۋىستىرۋ شەكتەلگەن. سونىمەن قاتار، ناۋقاستار دارىگەرلەردىڭ بىلىكتىلىگىنە سەنىمسىزدىگى ءارى ستاتسيونارلارداعى جاعدايلارعا كوڭىلدەرىنىڭ تولماۋى دا ورىن الىپ وتىر»، - دەپ توقتالدى دەپۋتات.
وسى ورايدا ك. مۇسىرمان قانداي ونكولوگيالىق اۋرۋلاردى تەك شەتەلدە ەمدەتۋ قاجەت ەكەنىن سۇرادى.
ءوز كەزەگىندە مينيستر ەلجان ءبىرتانوۆ ەلىمىزدە ارنايى كوميستسيا جۇمىس ىستەيتىنىن، بۇل تۇرعىدا شەتەلگە جىبەرىلەتىن ناۋقاستاردىڭ ءتىزىمى قارالاتىنىن ايتتى.
«بىرىنشىدەن، ەلىمىزدە پروتوندىق تەراپيا بولماعاننان كەيىن، جىل سايىن بالالاردى شەتەلدىك ورتالىقتارعا جىبەرۋدەمىز. سونىمەن قاتار 20-عا جۋىق ناۋقاستى گامما- تەراپياعا باعىتتايمىز. بيىل ۇلتتىق نەيروحيرۋرگيا ورتالىعىندا ارنايى ورتالىق اشىلىپ، كەلەسى جىلدان باستاپ بۇكىل ەم- دومدى ەلىمىزدە قامتيتىن بولامىز»، - دەدى مينيستر.
ونىڭ سوزىنە قاراعاندا، جىل سايىن قان اۋرۋلارىنا شالدىققان بالالار دا شەت مەملەكەتكە ترانسپلانتاتسياعا جىبەرىلەدى.
« بۇگىندە قازاقستانداعى ەكى ورتالىقتا ترانسپلانتاتسيا جاساۋدامىز، ءبىراق تا كەي جاعدايلاردا دونورلار بولماعاننان كەيىن، دونورلاردى قاراستىرۋ اياسىندا حالىقارالىق ورتالىقتارعا باعىتتايمىز. بۇل ماسەلە باقىلاۋدا، جىل سايىن وزىمىزدەگى ترانسپلانتاتسيالاردىڭ سانىن كوبەيتىپ جاتىرمىز. وسى رەتتە شەتەلگە جىبەرىلەتىن ونكولوگيالىق اۋرۋلاردىڭ دەڭگەيى تومەندەپ كەلەدى»، - دەدى ە. ءبىرتانوۆ.
بۇدان بۇرىن حابارلانعانداي، ۇكىمەت ساعاتى بارىسىندا مينيستر قازاقستاندىقتار قاتەرلى ىسىكتىڭ قاي تۇرىنە ءجيى شالدىعاتىنىن ايتتى.
اۆتور: رۋسلان عابباسوۆ