اقتوبەدەگى تەررورلىق اكتىدەن سوڭ مۇگەدەك بولىپ قالعان پوليتسەيگە پاتەر بەرىلدى
2016 -جىلى اقتوبە قالاسىندا تەررورلىق اكت بولىپ، قارۋلى توپ بىرنەشە قارۋ- جاراق دۇكەنى مەن اسكەري بولىمگە باسىپ كىردى. سول كەزدە وقيعا ورنىنا العاشقىلاردىڭ ءبىرى بولىپ جەتكەن پوليتسيا قىزمەتكەرى الىبەك جەتىعارين بۇگىن باسپانالى بولدى.
«الىبەك جەتىعارين 2014 -جىلى پوليتسيا قىزمەتكەرى اتانىپ، جول- پاترۋل باتالونىندا جۇمىس ىستەدى. ول 2016 -جىلدىڭ 5 - شىلدە كۇنى تەرروريستىك اكت بولعان كەزدە العاشقىلاردىڭ ءبىرى بولىپ وقيعا ورنىنا جەتتى. سول كەزدە وق ءتيىپ، اۋىر جارالاندى. باۋىرىنا زاقىم كەلىپ، وڭ قولىنا وق ءتيدى. قازىرگى كەزدە وڭ قولى دۇرىس جۇمىس ىستەمەيدى. سوندىقتان مۇگەدەكتىك بەرىلگەن.
ق ر «قۇقىق قورعاۋ قىزمەتى تۋرالى» زاڭى اياسىندا قىزمەتكەر 4 اي ەم الا الادى. ال اسا اۋىر بولسا 9 اي عانا ەم قابىلداۋعا رۇقسات بەرىلگەن. ءبىز 2 جىل ۋاقىت بەردىك، ءبىراق دەنساۋلىعىن قالپىنا كەلتىرۋ مۇمكىن بولمادى. سوندىقتان 2018 -جىلدىڭ قاراشا ايىندا پوليتسيا دەپارتامەنتىنەن جۇمىستان شىعارىلدى. ءبىراق، ونى مەن ەڭبەك دەمالىسىندا جۇرگەن كەزدە حابارلاپ، ايتپاعان. بۇگىنگى ءىسىمىزدى ايتقىزباي- اق ىستەۋىمىز كەرەك ەدى. سوندىقتان جۇمىستان شىعارۋ تۋرالى شەشىمگە قول قويعان ەكى قىزمەتكەردىڭ ءوزى جۇمىستان كەتىپ، بىرنەشە باسشى جازالاندى. الىبەككە 2 جىلدىق جۇمىستا 6 رەت سىياقى تاعايىندالدى، ونىڭ ۇشەۋى ق ر ءى ءى م بۇيرىعىمەن بەرىلدى. ەشقانداي ەسكەرتۋ الماعان پوليتسيا قىزمەتكەرى سول وقيعادان سوڭ «ەرلىگى ءۇشىن» مەدالىمەن ماراپاتتالدى. قازىرگى كەزدە الىبەككە 2 بولمەلى قىزمەتتىك پاتەر بەرىلىپ وتىر. پوليتسيا قىزمەتكەرلەرىنىڭ ءبارى 1 كۇندىك جالاقىسىن اۋداردى. بۇل - 7,5 ميلليون تەڭگە. سونىمەن قاتار، پوليتسيا دەپارتامەنتى تولەۋى ءتيىس 1,5 ميلليون تەڭگەنى اۋداردى. «دارۋ» وڭالتۋ ورتالىعىمەن ارنايى باعدارلاما جاسالىپ، ەم قابىلدايدى»، - دەدى اقتوبە وبلىستىق پوليتسيا دەپارتامەنتىنىڭ باستىعى ماحامبەت ابيساتوۆ.
ايتا كەتەيىك، جۇمىسسىز قالعان بۇرىنعى پوليتسيا قىزمەتكەرى الداعى ۋاقىتتا جالاقىسىنىڭ 50 پايىزىن الىپ وتىرادى. سونىمەن قاتار، پوليتسيا دەپارتامەنتىنىڭ باستىعى اقتوبە قالالىق سال اۋرۋىنا شالدىققانداردى قولداۋ ورتالىعىنىڭ ءتورايىمى قۇرالاي بايمەنوۆامەن حابارلاسىپ، جاڭا ءىس باستاۋعا كەڭەس بەردى. ءتىپتى بيزنەس اشۋ مۇمكىندىگى بار ەكەنىن جاسىرمادى.
«ءبىز دە كومەك كورسەتەمىز. ءاربىر پوليتسيا قىزمەتكەرى ەرلىك ۇمىتىلمايتىنىن ءبىلۋى كەرەك. الىبەكتىڭ ەرلىگىن ەشكىم ۇمىتپاۋ ءتيىس. العىس ايتامىز. ول ءبىزدىڭ جانىمىزدا بولادى. ونىڭ سۋرەتى پوليتسيا دەپارتامەنتىندە ءىلۋلى تۇر، ءبارى ۇلگى تۇتادى»، - دەدى ماحامبەت ابيساتوۆ.
ايتا كەتەيىك، الىبەك جەتىعارين قۇقىقتانۋ ماماندىعى بويىنشا ءبىلىم الىپ، كەيىن وتان الدىنداعى بورىشىن وتەگەن. تۋعان جەرگە قايتا ورالعان سوڭ پوليتسيا قىزمەتكەرى اتاندى.
«سول كۇنى شاقىرۋ ءتۇسىپ، ءبىز بارعان كەزدە «پاللادا» قارۋ- جاراق دۇكەنىنەن ءبىر توپ شىعىپ كەلە جاتتى. قارۋلى قارسىلىق كەزىندە ءىش- قۇرىلىسىما، قولىما وق ءتيدى. اۋرۋحانادا ۇزاق ۋاقىت ەمدەلىپ، شىقتىم. قازىر پاتەرلى بولىپ جاتىرمىن، العىسىمدى ايتامىن. ءوزىمنىڭ ءبىر قىزىم بار، جۇبايىم ەكىنشىسىنە جۇكتى»، - دەدى الىبەك جەتىعارين.
اۆتور: التىناي ساعىندىقوۆا