الماتى ناۋرىزعا قالاي دايىندالىپ جاتىر

الماتى. قازاقپارات -  ۇلىستىڭ ۇلى كۇنى ءاز ناۋرىزدىڭ كەلۋىنە بىرنەشە كۇن قالدى. ەلىمىزدىڭ مادەني ورتالىعى - الماتى قالاسى ناۋرىزدى بيىل دا دۋمانداتىپ تويلاماق.

قالانىڭ ءار اۋدانىندا مەرەكەگە دايىندىق باستالىپ كەتتى. بيىل قالادا باستى توي- دۋمان 7 اۋداندا بىردەي وتەدى. مەرەكەلىك كۇندەر ناۋرىزدىڭ 21-نەن 24-نە دەيىن جالعاسىپ، اشىق اسپان استىندا فەستيۆال ۇلگىسىندە ۇيىمداستىرىلادى.

 حالىق سەرۋەندەرى قالانىڭ 7 جەرىندە: 22,23 - ناۋرىز - استانا الاڭىندا؛ 21-24 - ناۋرىز - پانفيلوۆ، جىبەك جولى كوشەلەرىندە؛ 22 - ناۋرىز - «Halyk Arena» مۇز سارايىندا؛ 22 - ناۋرىز - «الماتى ارەنا» مۇز كەشەنىندە؛ 22 - ناۋرىز - «اتاكەنت»؛ 23 - ناۋرىز - «سۇڭقار» حالىقارالىق ترامپليندەر كەشەنىندە بولادى.

قازىر بۇل الاڭداردا ناۋرىزعا وراي بەزەندىرۋ جانە راسىمدەۋ جۇمىستارى ءجۇرىپ جاتىر.

الماتىلىق تيىننىڭ باسىنا تاقيا كيگىزىلىپ، قولىنا جاۋقازىن ۇستاتتى. مۇنىڭ الدىندا ونىڭ قولىندا جاڭعاق بولاتىن. الماتىلىقتاردى الىپ ينستاللياتسيا بۇدان بىلاي وسى كەيىپتە قارسى الادى.

قازاقپارات اگەنتتىگىنىڭ فوتوءتىلشىسى قالانىڭ باسقا دا اۋداندارىنداعى دايىندىق بارىسىمەن تانىسىپ قايتتى.

تولە بي كوشەسىندەگى «استانا» الاڭىندا اۆتوكولىك پەن اۆتوبۋس جولىندا قوزعالىس جابىلدى.

 

قازىر ول جەرگە ساحنا قويىلىپ جاتىر. بۇل الاڭدا 22-23 - ناۋرىز كۇندەرى ەسترادا جۇلدىزدارى ونەر كورسەتەدى. 23 - ناۋرىزدا مۋزارت توبى اشىق اسپان استىندا كونسەرت قويادى.

 

ۇلىستىڭ ۇلى كۇنى الماتى كوشەلەرىندەگى ناۋرىز شەرۋىمەن باستالادى. 21 - ناۋرىزدا قالا كوشەلەرىمەن ۇلتتىق كيىم كيگەن، ءسان- سالتاناتى كەلىسكەن دۋماندى توپ ساحنالانعان كورىنىس قويىپ وتەدى.

سونىمەن قاتار، قالادا 60 توننا باۋىرساق پەن كوجە تاراتىلادى.

ناۋرىزدىڭ 21-22 - كۇندەرى كۇن اشىق، 14+،17 + گرادۋس جىلى بولادى. 23-24 - ناۋرىزدا جاۋىن جاۋادى، ءبىراق اۋا تەمپەراتۋراسى تومەندەمەيدى.

اۆتور: گۇلميرا عوسمانالي