ورىس قىزىنا عاشىق بولىپ، كوپ ايەلدىلىكتەن باس تارتقان تايلاندتىق حانزادا جايلى نە بىلەمىز؟
سولاردىڭ ءبىرى ورىس قىزىن قۇلاي ءسۇيىپ، ونىمەن شاڭىراق كوتەرگەن سيام (قازىرگى تايلاند) كورولىنىڭ ۇلى چاكرابون حانازادا.
وسى ورايدا bigpicture.ru ەرتەرەكتەگى قوس عاشىقتىڭ ماحاببات حيكاياسىن نازارىڭىزعا ۇسىنادى.
17 جاستاعى جەتىم قىز ەكاتەرينا دەسنيتسكايا چاكرابون حانزادامەن 1905-جىلى اقسۇيەكتەردىڭ سالتاناتتى كەشىندە تانىسادى.
1897-جىلى كورول سيام ەۋروپا ەلدەرىنە ساياحاتتاپ ءجۇرىپ، رەسەيگە دە ات باسىن بۇرادى. نيكولاي II بەدەلدى قوناعىن سانكت-پەتەربۋرگتا قۇشاق جايا قارسى الىپ، كەزدەسۋ بارىسىندا رەسەيگە ۇلدارىنىڭ ءبىرىن وقۋعا جىبەرۋگە ۇسىنىس جاسايدى.
حانازدا چاكرابون بۇل ۇسىنىستى ءتيىمدى پايدالانىپ، كوپ كەشىكپەي ول رەسەيدەگى اقسۇيەكتەر وتباسىنىڭ بوزبالالارى وقيتىن يمپەراتورلىق ارنايى اسكەري وقۋ ورنىنا قابىلدانادى. وسىلايشا چاكرابون رەسەي ەلىنە كەلەدى.
وسى وقۋ ورنىن ءتامامداعاننان كەيىن حانزادا باس شتاب اكادەمياسىندا وقۋىن جالعاستىرىپ، ونى ورىس اسكەرىنىڭ پولكوۆنيگى دەگەن اتاقپەن ءبىتىرىپ شىعادى.
ال ەكاتەرينا بولسا، جەتىم وسكەن بويجەتكەن. ونىڭ اتا-اناسى ءسابي كۇنىندە قايتىس بولعان. ولار اعاسى ەكەۋى كيەۆتەن پەتەربۋرگكە كەلگەن. بۇل ۋاقىتتا ورىس-جاپون سوعىسى ءجۇرىپ جاتقان ەدى. كاتيا ۋچيليشەنى بىتىرە سالىپ، مايداناعا مەيىربيكە رەتىندە بارۋدى ءجون ساناعان. ونىڭ شەشىمىن ءتىپتى تاعدىر جولىندا چاكرابون حانزادامەن كەزدەسۋى دە وزگەرتە الماعان.
ءسويتىپ ول اقىرىندا تاياۋ شىعىسقا مايدانعا اتتانىپ كەتەدى. ال حانزادا بولسا، وعان كۇن سايىن حات جازىپ، ورالۋىن وتىنەتىن بولعان.
ەكاتەرينا دەسنيتسكايا پەتەربۋرگكە ورلاعاندا ونى مايداندا العان ماراپاتتارىنان بولەك ۇلكەن سىي كۇتىپ تۇردى. چاكرابون وعان ۇيلەنۋگە ۇسىنىس جاساپ، عاشىقتاردىڭ نەكە قيۋ ءراسىمى كونستانتينوپولدە وتەدى. سول ۋاقىتتا ول جەردە ءارتۇرلى كونفەسسيا وكىلدەرىنە نەكەگە تۇرۋعا رۇقسات ەتىلەتىن ەدى.
ءسويتىپ، سيام كورولدىگىنە حانزادا ايەلى ەكاتەرينامەن بىرگە ورالادى. الايدا چاكرابوننىڭ اتا-اناسى بۇل نەكەنى قۇپتامادى. ولار ۇلىن تەكسىز شەتەلدىك قىزعا ۇيلەنىپ، كورولدىك قان مەن باعزى سالتتى بۇزدى دەپ ساناعان. سەبەبى سيام ديناستياسىندا تەك ۇلكەن كورولدىك وتباسىنىڭ وكىلدەرىمەن عانا نەكەگە وتىرۋعا رۇقسات ەتىلگەن.
وسىدان كەيىن چاكرابون تاق مۇراگەرلەرى تىزىمىنەن الىنىپ، ءتىپتى قامقورلىقتان دا ايىرىلادى.
بارىنەن قاعىلعان چاكرابون اسكەري ۋچيليشەنىڭ باسشىسى رەتىندە جۇمىسقا تۇرىپ، وتباسىن ءوزى اسىراي باستايدى. قيىندىقتارعا قاراماستان جاس جۇبايلار وتە باقىتتى ءومىر ءسۇرىپ، ماحاببات پەن تاتۋلىقتا كۇن كەشكەن. ءتىپتى ەكاتەرينا ءۇشىن چاكرابون كوپ ايەلدىلىكتەن باس تارتقان كورولدىك ديناستياداعى العاشقى ادام بولدى.
ۋاقىت وتە كەلە چاكرابوننىڭ بەدەلدى وتباسى ۇلىنىڭ تاڭداۋىنا كونىپ، ورىس كەلىندى قابىل العان. بۇعان ولاردىڭ وتباسىندا 1908-جىلى ۇل بالانىڭ دۇنيەگە كەلۋىمەن جانە ەكاتەرينانىڭ سابىرلىعى، بويىنسۇنۋى، بايسالدى مىنەزى سەبەپ بولعان.
چاكرابون حانزادا تايلىق ارميانىڭ باستىعى كەيىن ەلدەگى اسكەري-اۋە كۇشتەرىنىڭ نەگىزىن قالاۋشى بولادى. ال ەكاتەرينا ەسىمىن حانشايىم اتىنا ساي نا پيتسانۋلوك دەپ وزگەرتىپ، بانگكوكتاعى ەڭ قالاۋلى قوناققا اينالادى. ول تاي ءتىلىن مەڭگەرىپ، اعىلشىن، فرانسۋز جانە نەمىس تىلدەرىندە ەركىن سويلەگەن.
الايدا ورىس قىزى مەن سيام حانزداسىنىڭ باقىتى كوپكە سوزىلمادى. 1920-جىلى چاكرابون حانزادا قايتىس بولادى. ال وعان دەيىن ءبىر جىل بۇرىن جۇبايلار اجىراسىپ كەتكەن. وعان سەبەپ چاكرابوننىڭ كوزگە ءشوپ سالۋى ەكەن. ەكاتەرينا دەسنيتسكايا تايلاندتا ۇلىن قالدىرىپ، ەلدەن كەتۋگە ءماجبۇر بولعان. سەبەبى وعان بالاسىن بەرمەگەن.
ايەل ادام تۋعان جەرى رەسەيگە دە ورالا الماعان. سەبەبى ول جاقتا ازاماتتىق سوعىس ءجۇرىپ جاتقان ەدى. كاتيا فرانسياعا ورنىعىپ، ءومىرىنىڭ سوڭىنا دەيىن ياعني 1960-جىلعا دەيىن سول ەلدە ءومىر سۇرگەن.
بۇگىندە ورىس حانشايىمى مەن سيام حانزاداسىنىڭ ۇرپاقتارى ءالى كۇنگە دەيىن تايلاندتا تۇرادى.
ايتا كەتەيىك، ەكى عاشىقتىڭ ومىرىنە ارقاۋ بولعان كوپتەگەن ادەبي تۋىندىلار جەتەرلىك.
مىسالى: ك. پاۋستوۆسكيدىڭ «دالەكيح گوداح»، گ. ۆوستوكوۆتىڭ «نەفريتوۆىي سلونەنوك»، ۆ. شكلوۆسكيدىڭ «پودپيسي ك كارتينكام»، ولاردىڭ نەمەرەسى تايلىق حانشايىم ناريسسا چاكرابوننىڭ «كاتيا مەن سيام حانزاداسى» اتتى شىعارمالارى بار.
2011-جىلى «كاتيا مەن سيام حانزاداسى» اتتى كىتاپتىڭ جەلىسىمەن ەكاتەرينبۋرگتاعى بالەت جانە وپەرا تەاترىندا بالەت قويىلعان.