وسكەمەندە «ۇزدىك ۇلتتىق كيىم» بايقاۋى وتەدى

وسكەمەن. قازاقپارات - ناۋرىز مەيرامىن مەرەكەلەۋ اياسىندا وسكەمەن قالاسىنىڭ اكىمدىگى ۇزدىك ۇلتتىق كوستيۋمگە كونكۋرس جاريالايدى، دەپ حابارلايدى قازاقپارات قالا اكىمىنىڭ باسپا ءسوز قىزمەتىنە سىلتەمە جاساپ.

«ءىس- شارا 22 - ناۋرىزدا ساعات 11.00-دە رەسپۋبليكا الاڭىندا باستالادى. بايقاۋعا بارلىق قالا تۇرعىندارى مەن قوناقتارى قاتىسا الادى. ول ءۇشىن رەسپۋبليكا الاڭىنا كەلىپ، بايقاۋدىڭ تىركەۋ پۋنكتىنە بارىپ، كەز كەلگەن ۇلتتىڭ ءداستۇرلى كوستيۋمىن مىنا نوميناتسيالار بويىنشا ۇسىنۋ قاجەت: «ۇزدىك ايەل كوستيۋمى»، «ۇزدىك ەرلەر كوستيۋمى»، «ۇزدىك بالالار كوستيۋمى»، «وتباسىلىق جۇپتىڭ ۇزدىك كوستيۋمى»، - دەپ ءمالىم ەتتى وسكەمەن اكىمىنىڭ باسپا ءسوز قىزمەتى.

كوستيۋمدەر ۇلتتىق داستۇرلەرگە سايكەستىگى، دايىنداۋ شەبەرلىگى مەن شىعارماشىلىق كوزقاراس تۇرعىسىنان باعالانادى. قازىرگى زامانعى كوستيۋمدە ۇلتتىق ەلەمەنتتەردى پايدالانۋ قاجەت.

سونداي- اق، بايقاۋ قورىتىندىسى بويىنشا ءاربىر نوميناتسيادا ينتەرنەت- داۋىس بەرۋ ارقىلى «كورەرمەن كوزايىمى سىيلىعى» يەگەرلەرى انىقتالادى. بۇل ءۇشىن الاڭدا ارنايى فوتو- ايماق ورناتىلادى. قاتىسۋشىلار سەلفي جاساپ، ونى #IloveOskemen  حەشتەگىمەن ينستاگرام الەۋمەتتىك جەلىسىندە جاريالاۋى ءتيىس. جەڭىمپازدار ەستەلىك سىيلىقتارعا يە بولادى.