قازاقستانعا قانداي ەلدەردەن تۋريستەر كوپ كەلەدى؟

استانا. قازاقپارات - قازاقستاندا تۋريزم سالاسىن جاڭا وزگەرىستەر كۇتىپ تۇر. سالالىق مەملەكەتتىك باعدارلاما ازىرلەندى، پارلامەنتكە جاڭا زاڭ جوباسى ەنگىزىلەتىن بولادى.

بۇل تۋرالى «Кazakh Tourism» كومپانياسىندا ءمالىم ەتتى، دەپ حابارلايدى قازاقپارات ءتىلشىسى.

اسىرەسە، الماتىداعى تاۋ تۋريزمىنە الداعى ۋاقىتتا 1 ميلليارد دوللار اقشا ءبولۋ قاراستىرىلىپ وتىر.

«قازاقستانداعى تۋريزم ءۇش باعىت بويىنشا وركەندەۋدە: 2018-جىلدىڭ ءۇش توقسانىنىڭ قورىتىندىسىنا سايكەس، كوشپەلى تۋريزم وتكەن جىلدىڭ ءتيىستى كەزەڭىمەن سالىستىرعاندا 4 پايىزعا (8,2 ميلليون تۋريستكە دەيىن)، كىرمەلى تۋريزم 16,6 پايىزعا (6,8 ميلليون ادامعا)، ىشكى تۋريزم 5,8 پايىزعا (4,6 ميلليون تۋريستكە) ارتقان. ىشكى تۋريستەردىڭ 78,3 پايىزى (3,4 ميلليون ادام) قوناق ءۇي، موتەل، دەمالىس ۇيلەرى مەن وزگە تۋريستىك بازالاردىڭ قىزمەتىن پايدالانعان. تۋريستەردىڭ 16,3 پايىزى (710 مىڭ ادام) تابيعي قورىقتار مەن باسقا دا كۇزەتىلەتىن تابيعي اۋماقتارعا بارۋدى قولاي كورگەن. تۋريستەردىڭ 5 پايىزى (235,9 مىڭ تۋريست) شيپاجايلى-كۋرورتتى مەكەمەلەردە دەمالعان»، - دەلىنگەن كومپانيانىڭ باسپا ءسوز حابارلاماسىندا.

«Кazakh Tourism» ا ق باسقارما ءتوراعاسى راشيت كۇزەمبايەۆتىڭ اتاپ وتۋىنشە، 2018-جىل بويى ىشكى تۋريزمنىڭ ءوسىمى 5 پايىزدى قۇراعان. كىرمەلى تۋريزم بويىنشا دا كورسەتكىش وسكەن.

تۋريستىك الەۋەتتى ارتتىرۋدىڭ ارقاسىندا قازاقستانعا ب ا ءا - دان (%50)، ءۇندىستاننان (%49)، مالايزيادان (%44)، گونكونگتان (%22)، پولشادان (%16)، وڭتۇستىك كورەيا (%15) مەن ا ق ش- تان (%5,8) كەلەتىن تۋريستەردىڭ سانى ارتقان. گەرمانيا مەن ۇلى بريتانيادان ساياحاتتايتىندار بۇرىنعى دەڭگەيدە قالعان.

مەملەكەت باسشىسى 2018-جىلدىڭ 5- قازانىندا قازاقستان حالقىنا جولداۋىندا تۋريزمدى دامىتۋ بويىنشا جەكە سالالىق مەملەكەتتىك باعدارلاما ازىرلەۋدى تاپسىرعان بولاتىن. راشيت كۇزەمبايەۆتىڭ حابارلاۋىنشا، باعدارلامانى ازىرلەۋ جۇمىسى فينالدىق ساتىعا جاقىنداپ قالعان. الداعى ءۇش-ءتورت ايدىڭ ىشىندە باعدارلاما تولىق دايار بولادى. بۇعان قوسا، تۋريزم بويىنشا زاڭ جوباسى دايىندالعان. قازىرگى ۋاقىتتا ول قۇجات ماقۇلداۋ ساتىسىندا. الداعى جارتى جىلدىڭ ىشىندە ونى پارلامەنتكە ەنگىزۋ كوزدەلىپ وتىر.

ەسكە سالا كەتەرلىگى، 2017-جىلى قازاقستاندا 2023-جىلعا دەيىن تۋريستىك سالانى دامىتۋ تۇجىرىمداماسى قابىلدانىپ قويعان بولاتىن. ول تۇجىرىمدانىڭ نەگىزگى مىندەتتەرىنە ىشكى جانە كىرمەلى تۋريزمدى دامىتۋ، ايماقتىق مادەني-تۋريستىك كەشەندەرىن دامىتۋ، مەملەكەتتىڭ ەكونوميكاسىنا تۋريستىك سالانىڭ سالاتىن ۇلەسىن ارتتىرۋ، ينۆەستيتسيالاردى ىنتالاندىرۋ، ۇلتتىق تۋريستىك برەندتى قالىپتاستىرۋ جۇمىستارى ەنگەن.

2018-جىلدىڭ ءۇش توقسانىنىڭ قورىتىندىسى بويىنشا قازاقستاندا قوناق ۇيلەر مەن وتەلدەردىڭ، وزگە دە تۇرۋعا ارنالعان ورىنداردىڭ سانى 3,3 مىڭعا، ياعني 2017-جىلدىڭ كورسەتكىشىنەن قاراعاندا 11,6 پايىزعا وسكەن. ولاردىڭ ىشىندە ەڭ كوپ سالىنعانى - مەيرامحاناسىز قوناق ءۇي (1,26 مىڭ). بۇدان بولەك، تۋريستەردىڭ قابىلداۋعا ءازىر ءبىر قاباتتى بۋنگالو، ۇيلەر مەن كوتتەدجدەردىڭ سانى 1 مىڭعا جەتكەن.

«مەملەكەت باسشىسى ماركەتينگتى كوممۋنيكاتسيانىڭ تيىمدىلىگىن ارتتىرۋ ءۇشىن باسىمدىققا يە نەگىزگى تۋريستىك اۋماقتاردى ايقىنداپ بەرگەن بولاتىن. ياعني، الداعى ۋاقىتتا الماتىنىڭ تاۋ كەشەنىن، شورتاندى جانە بۋراباي دەمالىس اۋماعىن، تۇركىستان، الاكول، ماڭعىستاۋ، باياناۋىل مەن بالقاش، شالقار يمانتاۋ دەمالىس اۋماقتارىنىڭ تۋريستىك الەۋەتىن ارتتىرۋعا ماڭىز بەرىلەدى»، - دەپ حابارلايدى «Кazakh Tourism» ا ق.