بەلگيادا الەۋمەتتىك قورعاۋ جۇيەسى قالاي جۇمىس ىستەيدى

استانا. قازاقپارات - بەلگيادا الەۋمەتتىك قورعاۋ جۇيەسى بۇرىننان قالىپتاسىپ، ونداعان جىل بويى تابىستى جۇمىس ىستەپ كەلەدى.

 بۇل ەلدە جاردەماقى كىمگە قالاي تولەنەدى جانە نەلىكتەن كەيدە تۇرعىندار وسى جۇيەگە نارازىلىق تانىتادى. بەلگيانىڭ الەۋمەتتىك قورعاۋ جۇيەسى ەۋروپاداعى ەڭ قولايلى جۇيەلەردىڭ ءبىرى سانالادى. ول تابىسى از، باسپاناسى جوق جانە قيىن جاعدايعا تۇسكەن ازاماتتارعا جاردەم بەرەدى.

سۆەتلانا پوپوۆا، تاۋەلسىز كەڭەسشى:

 - مىسالى، اجىراسقان ايەل كۇنكورىس قاراجاتىنسىز قالدى دەيىك. جۇمىسى جوق، كۇيەۋى دە اليمەنت تولەمەيدى. وسىنداي جاعدايدا С.Р.А.S الەۋمەتتىك قىزمەتى وعان شاعىن بولسا دا قارجىلاي كومەك بەرەدى. جۇمىسسىزدار مەن تابىسى از تۇرعىندارعا كۇنكورىس مينيمۋمى كورسەتكىشىنە قاجەتتى اقشا بەرىلەدى. بالالارى مەن اسىراۋىندا ادامدارى بار كىسىلەرگە جانە مۇگەدەكتەرگە جاردەماقى تولەنەدى. ونىڭ ءبولىنۋىن الەۋمەتتىك قىزمەتتەر مۇقيات قاداعالايدى.

الايدا ساراپشىلاردىڭ ايتۋىنشا، كەز كەلگەن جۇيەدە ايلا جاساۋدىڭ امالىن تابۋعا بولادى.

سۆەتلانا پوپوۆا، تاۋەلسىز كەڭەسشى:

 - دارىگەرگە بارىپ اۋىرىپ قالدىم دەگەن سىلتاۋمەن انىقتاما الاتىندار بار. وسى جۇيەنى الداۋدىڭ امالىن تاۋىپ، جاردەماقىعا كۇن كورۋگە بولادى. كەيبىرەۋلەردىڭ وسىلاي جاسايتىنى بارىنە ءمالىم. ءبىراق، ارينە، ادال ەڭبەك ەتكەن ارتىق. ويتكەنى جۇمىسىڭىز بەن تۇراقتى تابىسىڭىز بولسا، تۇرمىسىڭىزدى جاقسارتۋعا دا مۇمكىندىگىڭىز كوپ بولادى.

 الەۋمەتتىك جۇيەگە تولەم جاساپ جۇرگەن ازاماتتاردىڭ باسپانا مەن اۆتوكولىك ساتىپ الۋعا نەسيە الۋعا مۇمكىندىگى بار. زەينەتاقىسىنا قاراجات جيناپ جۇرگەندەر بولاشاعىن ۋايىمدامايدى. ال بيۋدجەتتى ۇنەمدەۋ ساياساتى مەن كوممۋنالدىق قىزمەتتەردىڭ قىمباتتىعىن ەسكەرسەك، جۇمىسسىزدار ءار تيىنىن ساناۋعا ءماجبۇر.

مارك، بريۋسسەل قالاسىنىڭ تۇرعىنى:

 - بۇل -  وتە وزەكتى ماسەلە. بەلگيا -  الەۋمەتتىك تولەمدەر جاعىنان وتە تارتىمدى ەل. ءبىراق نەگىزسىز تالاپتار مەن وسى جۇيەنى وزگەلەردىڭ ءجونسىز پايدالانۋىن مۇقيات باقىلاۋ قاجەت. ولاردىڭ كەسىرىنەن قوعامدا الەۋمەتتىك تەڭسىزدىك سەزىمى تۋىنداپ ءجۇر. ارينە، اۋقاتسىز قالعان مۇقتاج ادامدارعا كومەكتەسۋ كەرەك. ءبىراق وزگەلەرگە زيان كەلتىرمەي، وسى ءىستى رەتتەگەنى دۇرىس بولار ەدى.

 جانين، بريۋسسەل قالاسىنىڭ تۇرعىنى:

 - جۇمىسىندا قىسقارتۋعا تۇسكەن نەمەسە سىرقاتى سالدارىنان ەڭبەك ەتە المايتىندارعا جاردەماقى تولەۋ -  ءادىل شارا. ءبىراق ادەيى جۇمىس ىستەگىسى كەلمەيتىندەرگە نەمەسە قاي- قايدان كەلگەندەرگە كومەك بەرۋ دۇرىس ەمەس. ولار ورتاق قازىنامىزدان اقشا الاتىنداي الەۋمەتتىك جۇيەمىزگە ەشبىر جارنا تولەگەن جوق. الەۋمەتتىك قىزمەتتەر ادال سالىق تولەۋشىلەرگە كاسىبي تۇرعىدان جەتىلۋىنە كوپ جاعداي جاساپ ءجۇر. جۇمىسسىز قالعاندارعا جاڭا ماماندىق ۇيرەتەتىن كۋرستار بار. الايدا كەيبىر ادامدار ءۇشىن ۇنەمى مەملەكەتتىك قولداۋعا سەنۋ جامان ادەتكە اينالعان.

www.24.kz