پەتروپاۆلدا وتكەن ايتىستىڭ باس جۇلدەسىن سەرىك قۇسانبايەۆ جەڭىپ الدى

None
None
وسكەمەن. قازاقپارات - پەتروپاۆل قالاسىندا اقىن ەرىك اسقاروۆتىڭ 60 جىلدىعىنا وراي وتكەن رەسپۋبليكالىق ايتىستا وسكەمەندىك ايتىسكەر سەرىك قۇسانبايەۆ باس جۇلدە الدى، دەپ حابارلايدى قازاقپارات ءتىلشىسى.

ايتىستا ءوزىنىڭ ايقىن قولتاڭباسىن قالدىرىپ، دراماتۋرگيا مەن پوەزيا الەمىندە ۇلت رۋحانياتىنا سۇبەلى ۇلەس قوسقان ەرىك اسقاروۆتىڭ رۋحىن اسقاقتاتۋ ءۇشىن قىزىلجاردا ەلىمىزدىڭ ءار بۇرىشىنان 22 ايتۋلى ايتىسكەر اقىن باس قوسقان بولاتىن.

ايتىس سۇيەر قاۋىم بۇل دوداعا الدىن الا «رەترو ايتىس» دەپ ايدار تاعىپ ۇلگەردى. ويتكەنى ساحناعا ە. اسقاروۆپەن بىرگە ايتىسقان اعا بۋىن وكىلدەرى مەن بۇگىندە الاماننىڭ الدىن بەرمەي جۇرگەن ايگىلى اقىندار قاتار شىققان بولاتىن.

ەكى اينالىمعا سوزىلعان جىر جارمەڭكەسىندە «سولاقاي سەرى» اتانعان وسكەمەندىك اقىن سەرىك قۇسانبايەۆ باس جۇلدەگە يە بولىپ، 2000000 تەڭگەنى قانىجاعاسىنا بايلادى.

«ايتىستىڭ ءبىرىنشى ورىنى تۇركىستان وبلىسىنان كەلگەن مارجان ەسجانوۆاعا بۇيىرسا، ەكىنشى ورىن قاراعاندىلىق امانجول التايەۆتىڭ قانجىعاسىندا كەتتى. ءۇشىنشى ورىننىڭ جۇلدەسىن بەكارىس شويبەكوۆ پەن مۇحتار نيازوۆ يەلەندى. سەرىك قاليەۆ پەن قۇدايبەرلى مىرزابەكوۆ ىنتالاندىرۋ سىيلىعىنا يە بولدى. قالعان قاتىسۋشىلاردىڭ بارلىعىنا 200 مىڭ تەڭگەنىڭ ديپلومى تابىستالدى»، - دەيدى شارانى ۇيىمداستىرۋشىلاردىڭ ءبىرى جارقىن جۇپارحان.

جەرلەسىمىزدى ايشىقتى جەڭىسىمەن قۇتتىقتاۋ ءۇشىن تەلەفون شالدىق.

«ەرىك اسقاروۆپەن ايتىس الاڭىندا جولىمىز بىرنەشە رەت ءتۇيىستى. ءتىلىپ ايتاتىن، تاۋىپ ايتاتىن، تالاتتى ايتىسكەر ەدى. جاسى ۇلكەن بولعاندىقتان وزىمە رۋحاني اعا تۇتاتىنمىن. سوندىقتان، التايدان ات ارىتىپ، وسى تويعا ارنايى كەلدىم. ءبىرىنشى اينالىمدا ەكى قازى «9» قويىپ، مۇمكىندىگىمدى تومەندەتىپ جىبەرگەن. رينات زايتوۆ سول ولقىلىقتىڭ ورنىن تولتىرىپ، ءوز جولىن ماعان بەردى. اقتىق سىندا قۇدايبەرلى مىرزابەكپەن جولىم ءتۇيىستى»، - دەيدى اقىننىڭ ءوزى.

سوڭعى جاڭالىقتار