شىمكەنت «شاتتىق كۇنىن» اتاپ ءوتتى

شىمكەنت. قازاقپارات - شىمكەنتتىكتەر ناۋرىز مەيرامى قارساڭىندا «شاتتىق كۇنىن» اتاپ ءوتتى. قالا ورتالىعىنداعى ارباتتا وتكەن مەرەكەلىك شارادا قازاقتىڭ كيىز ءۇيى تىگىلىپ، ۇلتتىق تاعامدار ازىرلەندى، دەپ حابارلايدى قازاقپارات ءتىلشىسى.

قوناقتارعا قىمىز، شۇبات، قىمىران سىندى ۇلتتىق سۋسىندارمەن قاتار ناۋرىز كوجە تاراتىلدى. جاستار جاعى «party» ۇيىمداستىرىپ، مەرەكەنىڭ كوركىن اشا ءتۇستى. مۇندا قازاقتىڭ ءداستۇرلى اۋەندەرى شىرقالىپ، كوپشىلىككە كوتەرىڭكى كوڭىل-كۇي سىيلادى. مەرەكەگە وزبەكستان مەن قىرعىزستاننان كەلگەن قوناقتار دا قاتىسىپ، ۇلتتىق سپورت تۇرلەرىنەن سايىستار ۇيىمداستىرىلدى.

شاتتىق كۇنى اياسىندا سونداي-اق، ءتۇرلى بۇيىمدار مەن ءتاتتى تاعامداردىڭ جارمەڭكەسى ءوتتى. قالا اكىمىنىڭ ورىنباسارى دانات جۋميننىڭ ايتۋىنشا، الداعى كەزدە شىم شاھاردىڭ ارباتىندا وسىلاي تۇراقتى جارمەڭكە ءوتىپ تۇرماق. وندا ارنايى ساۋدا نۇكتەلەرى قويىلىپ، قولونەر شەبەرلەرىنىڭ بۇيىمدارى مەن ءتاتتى تاعامدار ساۋدالاناتىن بولادى. قالاداعى كاسىپكەر قىز-كەلىنشەكتەردىڭ شاعىن كاسىپپەن اينالىسۋىنا قولداۋ كورسەتىلەدى.