ناۋرىز: قازاقپارات ءتىلشىسى وزبەكستاندا سۋمالاك تاعامىن ازىرلەۋگە قاتىستى

 تاشكەنت. قازاقپارات - ناۋرىز ايىنىڭ ورتاسىنان باستاپ وزبەكستاندا سۋمالاك مەرەكەلىك تاعامى دايىندالادى.

ناۋرىز مەيرامىنا ارنالعان ءدامدى ازىرلەۋگە نيەتتى ادامداردىڭ بارلىعى قاتىسا الادى جانە بۇل قۇرمەتتى ءىس سانالادى. ويتكەنى، ەجەلگى نانىمعا سايكەس، سۋمالاكتى دايىنداۋعا قاتىساتىن ايەلدەر مەن قىزدار باقىتتى ءومىر سۇرەدى. «قازاقپارات» ح ا ا مەنشىكتى ءتىلشىسى ءداستۇرلى وزبەك تاعامىنىڭ دايىندالۋ شاراسىنا قاتىسىپ، وقىرماندار نازارىنا فوتورەپورتاج ۇسىنادى.

 

 سۋمالاكتىڭ قۇرامىنا ەنەتىن نەگىزگى اس - بيداي. ادەتتە بيداي 5-7 كۇن ىشىندە ەگىلەدى. سودان كەيىن، ۇلكەن ىدىسقا سالىنعاننان كەيىن، ايەلدەر قاۋىمى سۋ قۇيا وتىرىپ، ونى بىركەلكى ەتىپ ارالاستىرىلادى. ناتيجەسىندە پايدا بولعان بوتقانى جەكە ىدىسقا ءسۇزىپ الىپ، ءوندىرىلىپ الىنعان اق ءسۇتتى ۇلكەن قازانعا قۇيادى. سۇزگىدەن قالعان قالدىقتى تاستاماي، ءۇي جانۋارلارىنا بەرەدى، جەرگىلىكتى تۇرعىندار بيداي ءدانىنىڭ قالدىقتارى جانۋارلار ءۇشىن پايدالى بولاتىنىنا سەنەدى. بيدايدى سۇزگىدەن وتكىزۋ كەزەڭىمەن قاتار ءبىر مەزگىلدە ماقتا مايى قۇيىلىپ، قىزدىرىلادى. قىزدىرىلعان مايعا بىركەلكى رەتپەن بيدايدان الىنعان ءسۇت قۇيىلادى. ۇن تۇيىرلەرىن بولدىرماۋ ءۇشىن ۇزدىكسىز ارالاستىرا وتىرىپ، بىرتىندەپ ۇن قوسىلادى. پايدا بولعان بىركەلكى سۇيىقتىققا اس ازىرلەۋشىلەر الدىن الا تازارتىلىپ جۋىلعان، كولەمى جاڭعاقتاي دومالاق تاستاردى تاستايدى. تاستار ۇننىڭ كۇيۋ ءقاۋپى مەن كەسەكتەلىپ كەتپەۋىنە سەپتىگىن تيگىزەدى. سونداي- اق، تاعامدى جەۋ كەزىندە ءسىزدىڭ تاباعىڭىزدان وسىنداي تاس شىقسا، تىلەك تىلەۋىڭىز كەرەك جانە سول تاستى تۇمار رەتىندە ساقتاپ قويۋ قاجەت دەگەن نانىم بار.

 

 سۋمالاكتى ۇنەمى ارالاستىرىپ تۇرۋ شارت. ونى قايناتۋ كەزەڭى شامامەن 22-24 ساعاتقا سوزىلادى. ەرەجە بويىنشا بۇل استى تەك ايەلدەر قاۋىمى ازىرلەيدى، سول سەبەپتى اس دايىنداۋ شاراسىنا كورشىلەر، تۋىسقاندار، قوناقتار قازاندىق باسىندا كەزەك الماستىرا وتىرىپ قاتىسادى. اس كۇنى بويى دايىندالادى. سوڭىندا سۋمالاك قويۋلانا ءتۇسىپ، قويۋ قوڭىر تۇسكە بويالادى، حوش ءيىس شىعارا باستايدى. تاعام قايناتىلىپ بولعان سوڭ، قازاندىقتاردىڭ اۋزى بەرىك جابىلىپ، ءبىر تۇنگە قالدىرىلادى، بۇل ۋاقىتتا قاقپاق استىندا بۇعىپ ءتيىستى قالپىنا كەلەدى. ءبىر قىزىعى، وعان قانت قوسىلمايدى، الايدا ونىڭ ءتاتتى جانە جاعىمدى ءدامى بار.