استانادا ارحيۆتىك جوباعا بايقاۋ جاريالاندى

استانا. قازاقپارات - استانادا ارحيۆ عيماراتىن ءتيىمدى پايدالانۋ يدەياسىنا ارنالعان جوباعا بايقاۋ جاريالاندى. بۇل تۋرالى استانا قالاسى تىلدەردى دامىتۋ جانە ارحيۆ ءىسى باسقارماسى باسشىسىنىڭ ورىنباسارى ساكەن ەسىركەپ ءمالىم ەتتى، دەپ حابارلايدى قازاقپارات.

«استانا قالاسى ءارحيۆىن زاماناۋي ۇلگىدە جەتىلدىرۋ جۇمىستارى باستالىپ كەتتى. الداعى ەكى جىلدا ارحيۆتە جيناقتالعان ميلليونداعان قۇجاتتار سكانەرلەنىپ، تولىق ەلەكتروندى فورماتقا اۋىسادى. قۇجاتتار جۇرتشىلىققا قولجەتىمدى بولا تۇسەدى» ، - دەپ جازدى باسقارما باسشىسىنىڭ ورىنباسارى ءوزىنىڭ فەيسبۋك پاراقشاسىندا.

ونىڭ ايتۋىنشا، بۇگىندە ارحيۆ قۇجاتتارىن كەڭ قولدانىسقا ەنگىزۋ ءۇشىن عىلىمي ينستيتۋتتارمەن، وقۋ ورىندارىمەن بايلانىس نىعايتىلۋدا.

«قازىر ارحيۆ عيماراتىنىڭ 85 شارشى مەترلىك بولمەسىن ءتيىمدى پايدالانۋ بويىنشا يدەيالار قابىلدانىپ جاتىر. بۇگىن وسى ماسەلە بويىنشا بىرنەشە جوبانى قارادىق. ءبىراق ۇسىنىستار اشىلماعان، تىم قاراپايىم بولعاسىن قابىلدامادىق. نەگىزگى وي - ءارحيۆتىڭ ءبىر بولمەسىن ازاماتتارعا قىزىقتى، پايدالى ورىنعا اينالدىرۋ. عىلىمي- تانىمدىق شارالار ۇيىمداستىراتىن، سۇحباتتاساتىن، ينتەللەكتۋالدىق ورتا قالىپتاستىراتىن نەمەسە بالالار بارۋعا قۇمارتاتىن ت. ب. قوسىمشا ۇسىنىستار قاجەت» ، - دەيدى س. ەسىركەپ.

ەڭ ۇزدىك جوبا يەسىنە سىياقى رەتىندە 200 مىڭ تەڭگە بەرىلەدى. بايقاۋعا قاتىستى باسقا دا اقپاراتتى 87750944276, 87013222555 ۇيالى تەلەفوندارى ارقىلى بىلۋگە بولادى.