الەمدىك باسپا ءسوز ناۋرىز تۋرالى نە جازادى؟
2010 -جىلى بىرىككەن ۇلتتار ۇيىمى ناۋرىز مەرەكەسىن - حالىقارالىق كۇن رەتىندە جاريالادى. تىرشىلىك الەمى ويانىپ، قايتا تۇلەيتىن ناۋرىز مەيرامىن تۇركى حالىقتارى عانا ەمەس، الەمنىڭ كوپتەگەن ەلدەرى ۇلكەن قۋانىشپەن قارسى الىپ، ىستىق ىقىلاسپەن مەرەكەلەيدى. وسىعان بايلانىستى «قازاقپارات» ح ا ا وقىرمان نازارىنا ناۋرىز تۋرالى الەمدىك اقپارات كوزدەرىنە جاريالانعان ماتەريالدارعا شولۋىن ۇسىنادى.
جاڭا جىلدا الەم جاڭارادى - India Today
«الەمنىڭ كوپتەگەن مەملەكەتتەرىندە جاڭا جىل رەتىندە كوكتەمنىڭ العاشقى كۇنى تويلانادى. ەجەلگى كۇنتىزبە بويىنشا بۇل 21 - ناۋرىزعا ساي كەلەدى. ناۋرىز مەيرامىن ءارتۇرلى ءدىن وكىلدەرى، ءارتۇرلى حالىقتار تويلايدى. بۇل مەرەكەدە بۇكىل الەم جاڭارادى» ، دەپ جازادى India Today باسىلىمى. اۆتور ماقالادا ناۋرىز مەيرامىن تويلاۋ 3 مىڭ جىل بۇرىن باستالعانىن اتاپ وتەدى.
«ناۋرىز جاڭا ءومىردىڭ باستاۋى. بۇل مەرەكەنى تويلايتىن حالىقتار وسى كۇنى ۇلتتىق كيىمدەرىن كيىپ، ءداستۇرلى تاعامدارىن ازىرلەيدى. ءبىر بىرىنەن كەشىرىم سۇراپ، بەيبىت ءومىر تىلەيدى» ، دەپ جازادى اۆتور. ونىڭ ايتۋىنشا، ناۋرىز قارساڭىندا قايىرىمدىلىق جاساۋشىلار قاتارى ارتادى.
ناۋرىزدا كۇن مەن ءتۇن تەڭەسەدى - The Telegraph
«كوكتەمدە جىل مەزگىلدەرى الماسىپ، كۇن مەن ءتۇن تەڭەسەدى. اۋا رايى سالقىن بولعانىمەن، بۇل ۇزاق ۋاقىت المايدى. سەبەبى كوكتەمنىڭ استرونوميالىق باسى 1 - ناۋرىز ەمەس، 21-22 - ناۋرىزعا تۇسپا تۇس كەلەدى. ءدال وسى كەزدە كۇن ۇزارىپ، ءتۇن قىسقارادى. جەر گۇلگە ورانىپ، كۇن رايى جىلىنادى» ، دەپ جازادى The Telegraph باسىلىمى.
اۆتور ماقالادا ناۋرىزدىڭ ءدال وسى كۇندەرى كۇن مەن ءتۇننىڭ تەڭەسەتىنىن جازادى.
«كوكتەمنىڭ بۇل كەزىندە كوپتەگەن مەملەكەتتەردە ناۋرىز مەرەكەسى تويلانادى. ناۋرىز كوپتەگەن مادەنيەتتەردە ەڭ نەگىزگى مەيرام سانالادى، سەبەبى ءدال وسى ۋاقىتتا كۇن جەردىڭ ەكۆاتورىنان وتەدى» ، دەپ جازادى اۆتور. ماقالادا اۆتور كۇننىڭ شىعىسىن دا، باتىسىن دا ءدال وسى كەزەڭدەردە كورۋگە بولاتىنىن، جىلدىڭ باسقا مەزگىلدەرىندە بۇل مۇمكىن ەمەس ەكەنىن ايتادى.
«ناۋرىز كوپتەگەن ەلدەردە جىل باسى سانالادى. پارسى تىلىنەن اۋدارعاندا بۇل ءسوز «جاڭا كۇن» دەگەن ماعىنانى بەرەدى. ناۋرىز مەرەكەسى ءۇش مىڭ جىل بۇرىن تويلانا باستاعان. بۇگىنگى تاڭدا بۇل مەرەكە ورتالىق ازيا، باتىس ازيا، كاۆكاز ەلدەرىندە كەڭ تاراعان» ، دەپ جازادى اۆتور. ونىڭ ايتۋىنشا، كەڭەس وداعى كەزىندە ناۋرىز رەسمي تۇردە تەك يراندا تويلانىپ كەلگەن.
«كاۆكاز جانە ورتالىق ازيا ەلدەرى تاۋەلسىزدىك العان سوڭ عانا ناۋرىزدى ۇلتتىق مەرەكەلەرى رەتىندە تانىدى» ، دەيدى اۆتور.
امەريكادا ناۋرىز فەستيۆالى وتەدى - The Los Angeles Times
لوس اندجەلەستە بيىل التىنشى جىل قاتارىنان ناۋرىز فەستيۆالى تويلانادى. The Los Angeles Times باسىلىمىنىڭ جازۋىنشا، ناۋرىز ەجەلگى كۇنتىزبەدەگى ەڭ ماڭىزدى مەيرامداردىڭ ءبىرى.
«ەجەلگى ادامداردىڭ دانا بولعانى سونشا، ولار جاڭا جىلدى تابيعات انانىڭ جاڭارۋىنا تۇسپا تۇس كەلەتىن ۋاقىتتا، ياعني، ناۋرىز ايىندا تويلاعان. بۇل مەرەكە جەر شارىنداعى ءومىردىڭ جاسارۋىن، جاڭارۋىن كورسەتەدى» ، دەپ جازادى اۆتور. ونىڭ جازۋىنشا، تابيعات انا باردا ناۋرىز مەرەكەسى دە تويلانا بەرەدى.
«ا ق ش پرەزيدەنتتەرى سوڭعى قىرىق جىلدا ناۋرىزدى تويلايتىن حالىقتارعا قۇتتىقتاۋ جولدايدى. ناۋرىز ادامدارعا ماحاببات، بەيبىتشىلىك، سۇيىسپەنشىلىك، باقىت تۋرالى ەسكە سالادى. تۇپتەپ كەلگەندە، بۇكىل ادامزات ءبىر وتباسى ەمەس پە؟ » ، دەيدى اۆتور.
كاليفورنيا ۋنيۆەرسيتەتىندە ناۋرىز تويلانادى - NBC
«كوكتەمدە سامال جەل ەسىپ، اسەم گۇلدەر شىعا باستايدى. بۇل كەزەڭ توي تويلاپ، ءان ايتۋعا ارنالعانداي. دەگەنمەن، كوكتەمنىڭ كەلگەنىنەن- اق كوپشىلىگىمىز ۋاقىتىمىزدى كوڭىلدى وتكىزۋگە تىرىسامىز. ال الەمنىڭ تۇكپىر تۇكپىرىندە كوپتەگەن حالىقتار بۇل ايدا جاڭا جىلدى قارسى الىپ، ناۋرىز مەرەكەسىن تويلايدى» ، دەپ جازادى NBC باسىلىمى.
اۆتور ماقالادا ناۋرىز مەيرامىندا حالىق ءبىر بىرىنە مەيىرىن توگىپ، جاقىنداي تۇسەتىنىن، ۇلتتىق كوستيۋمدەر كيىپ، ءتۇرلى كونتسەرتتەر ۇيىمداستىرىلاتىنىن جازا كەلە، كاليفورنيا ۋنيۆەرسيتەتى بيىل 11- رەت تەگىن ءىس شارا ۇيىمداستىراتىنىن ايتادى.