پرەمەر- مينيستر تۇركىستان وبلىسىن دامىتۋ پەرسپەكتيۆالارى جونىندە كەڭەس وتكىزدى

None
None
تۇركىستان. قازاقپارات - بۇگىن تۇركىستان وبلىسىنا رەسمي ساپارمەن كەلگەن قر پرەمەر- ءمينيسترى اسقار مامين قالانىڭ دامۋ پەرسپەكتيۆالارى جونىندە كەڭەس وتكىزدى.

 ونىڭ بارىسىندا وبلىس ورتالىعىندا نىسانداردى سالۋ بويىنشا اعىمداعى جاعداي مەن جۇرگىزىلىپ جاتقان جۇمىستار بارىسى ءسوز بولدى، دەپ حابارلايدى قازاقپارات ءتىلشىسى.

سەلەكتورلىق رەجىمدە وتكەن كەڭەسكە ەلىمىزدىڭ ءبىرقاتار قالا، وبلىس اكىمدەرى مەن مينيسترلىكتەردىڭ وكىلدەرى، جەرگىلىكتى دەپۋتاتتار مەن باسقارما باسشىلارى قاتىستى. وتىرىستا تۇركىستان قالاسىنىڭ اكىمشىلىك- ىسكەرلىك ورتالىعىن، تۇرعىن ءۇي الاپتارىن جانە الەۋمەتتىك ماڭىزى بار نىسانداردى سالۋ بارىسى ايتىلدى.

 وبلىس اكىمى ءومىرزاق شوكەيەۆ اتقارىلىپ جاتقان قۇرىلىس جۇمىستارىنىڭ بارىسىن بايانداپ، باس جوسپارعا سايكەس سالىناتىن 22 نىساننىڭ باسىم بولىگىنىڭ قۇرىلىسى باستالعانىن اتاپ ءوتتى. الايدا، 4 نىساننىڭ قۇرىلىس الاڭى قورشالعانىمەن، جۇمىستار كەشەۋىلدەپ جاتقانىن جەتكىزدى.

 «قۇرىلىسى باستالماعان نىساندار قاتارىندا استانا الاڭى، تۋريزم كوللەدجى، جابىق باسسەينى بار سپورت كەشەنى جانە وليمپيادالىق رەزەرۆتەگى سپورت مەكتەبى بار. 5 نىساندا جەردى راسىمدەۋ جۇمىستارى اياقتالىپ، جوبانى ازىرلەۋ مەن قۇرىلىس جۇمىستارىن باستاۋ جونىندە وڭىرلەر مەن بيزنەس وكىلدەرىنە ۇسىنىس بەرىلدى. تۇرعىن ءۇي كەشەندەرى مەن مۋزىكالىق مەكتەپ، قازپوشتا مەن قالالىق ساياباق، حالىققا قىزمەت كورسەتۋ ورتالىعى مەن «سمارت سيتي» جوباسى اياسىندا بايلانىس جەلىلەرىن تارتۋ بويىنشا جوبالار ازىرلەنۋدە. اعىمداعى جىلى 3 نىسان (وبلىس اكىمدىگى، مەديا ورتالىعى، ساياباق) پايدالانۋعا بەرىلەدى دەپ جوسپارلانىپ وتىر» ، - دەدى ءومىرزاق شوكەيەۆ.

سونىمەن قاتار ايماق باسشىسى اكىمشىلىك عيماراتتارى، تۇرعىن ءۇي كەشەندەرى، سپورت، دەنساۋلىق ساقتاۋ، ءبىلىم بەرۋ، مادەنيەت جانە الەۋمەتتىك سالالارداعى 80 نىسان اكىمشىلىك- ىسكەرلىك ورتالىعىنا ورنالاستىرىلعانىن ايتىپ ءوتتى. رەسپۋبليكالىق بيۋدجەتتەن 2019 -جىلعا 28,2 ميلليارد تەڭگە ءبولىنىپ، اكىمشىلىك عيماراتتاردىڭ، ءبىلىم بەرۋ، تۇرعىن ءۇي جانە ينفراقۇرىلىم نىساندارىنىڭ قۇرىلىسى قارقىندى ءجۇرىپ جاتىر.

 «اكىمشىلىك- ىسكەرلىك ورتالىعىندا جالپى 114 تۇرعىن ءۇيدىڭ قۇرىلىسى جۇرگىزىلۋدە. اتاپ ايتقاندا، 1200 پاتەرلىك ارەندالىق 20 تۇرعىن ءۇيدىڭ 11- ماۋسىم ايىندا تاپسىرىلادى. ال، 540 پاتەرلىك 9 تۇرعىن ءۇي (جەلتوقسان ايىندا پايدالانۋعا بەرىلەدى. كرەديتتىك 6 تۇرعىن ءۇي تامىز ايىندا تاپسىرىلادى. ولار ءتيىستى ينفراقۇرىلىم جۇيەلەرىمەن جوسپارعا سايكەس تولىق قامتاماسىز ەتىلەدى. سول سياقتى «تۇركىستان» ا ك ك جانە جەكە ينۆەستورلاردىڭ ەسەبىنەن 88 تۇرعىن ءۇيدىڭ قۇرىلىسى جوسپارلانۋدا. ونىڭ ىشىندە مەملەكەتتىك قىزمەتكەرلەردى تۇرعىن ۇيمەن قامتاماسىز ەتۋ ماقساتىندا 10,0 ميلليارد تەڭگەگە 26 تۇرعىن ءۇيدىڭ قۇرىلىسى جۇرگىزىلىپ، جىل سوڭىنا دەيىن پايدالانۋعا بەرىلمەك. قالعان 62 تۇرعىن ءۇيدى 2020 -جىلى تاپسىرۋ جوسپارلانىپ وتىر» ، - دەدى ءومىرزاق شوكەيەۆ.

ەسكە سالايىق، مينيسترلەر كابينەتىنىڭ باسشىسى بۇگىن تاڭەرتەڭ تۇركىستان وبلىسىنا جۇمىس ساپارىمەن كەلدى. ول بۇعان دەيىن وبلىستىڭ جاڭا اكىمشىلىك ىسكەرلىك- ورتالىعىنىڭ، 7 مىڭ ورىندىق ستاديوننىڭ، وقۋشىلار سارايىنىڭ قۇرىلىس الاڭىندا بولدى. سونداي- اق تۇرعىن ۇيلەردىڭ، ب ا ق وكىلدەرىنە ارنالعان جاڭا مەدياورتالىقتىڭ جانە وزگە دە نىسانداردىڭ قۇرىلىسىمەن تانىستى.

سوڭعى جاڭالىقتار