اتقارۋشى ورگانداعى «قولجەتىمدى اكىمدىك» قانداي جوبا
بۇل تۋرالى بۇگىن كاسىپكەرلەردىڭ سىبايلاس جەمقورلىققا قارسى ءىس-قيمىلى جونىندەگى Ⅲ رەسپۋبليكالىق فورۋمدا ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اليك شپەكبايەۆ ايتتى، دەپ حابارلايدى قازاقپارات ءتىلشىسى.
«ءبىز 2020 -جىلدىڭ سوڭىنا قاراي مەملەكەتتىك قىزمەتتەردىڭ 90 پايىزى ەلەكتروندى تۇردە، ال قالعان 10 پايىزى «ءبىر تەرەزە» ارقىلى كورسەتىلۋىن كوزدەپ وتىرمىز. ءبىرقاتار وبلىس اكىمدىگىندە تۇرمىستىق جەمقورلىقتى تومەندەتۋگە مۇمكىندىك بەرەتىن جايلى فرونت- كەڭسەلەر قۇرىلدى»، - دەدى اگەنتتىك باسشىسى.
ونىڭ ايتۋىنشا، 50 جەرگىلىكتى اتقارۋشى ورگاندا «قولجەتىمدى اكىمدىك» جوباسى ىسكە قوسىلدى. وندا ارنايى جابدىقتالعان وپەراتسيالىق زالدان ساۋلەت، قالا قۇرىلىسى، جەر قاتىناستارى، اۋىل شارۋاشىلىعى سىندى سالالارداعى 25 قىزمەت ءتۇرىن الۋعا مۇمكىندىك بار.
«قىزمەتتىك الاڭدار دا وڭتايلاندىرىلىپ جاتىر. وۋپەن-سپەيستەر ەنگىزىلۋدە. ىشكى بيزنەس- پروتسەسستەر تۇبەگەيلى قايتا قاراستىرىلۋدا. كليەنتكە باعدارلانعان ءادىس قۇقىق قورعاۋ ورگاندارى مەن سوت سالاسىندا دا تارالىپ جاتىر. شاعىن جانە ورتا بيزنەستىڭ دامۋىنا ءجيى كەدەرگى بولاتىن تۇرمىستىق جەمقورلىقتى جويۋ جانە بيۋروكراتيانى تومەندەتۋگە باعىتتالعان ءبىرقاتار باستاما «جەمقورلىقتان ادا وڭىرلەر» جوباسى اياسىندا قارقىندى جۇزەگە اسىرىلىپ جاتىر. كوپتەگەن باسشىنىڭ وزگەرىستەرگە شىنايى ۇمتىلىسىن كورىپ وتىرمىز. ولار كرەاتيۆتى ءارى باستاماشىل، يننوۆاتسيانى تابىستى ەنگىزىپ جاتىر جانە جاۋاپكەرشىلىك الۋدان قورىقپايدى. مۇنداي باسقارۋشىلار كوپ بولعان سايىن ازاماتتاردىڭ قاجەتتىلىگىنە باعدارلانعان يننوۆاتسيالىق مەملەكەتتىك اپپارات قالىپتاستىرۋ ماقساتىنا تەزىرەك جەتەتىن بولامىز»، - دەدى اليك شپەكبايەۆ.