قازاقستان جاس فۋتبولشىلاردى دايىنداۋعا شەتەلدىك باپكەرلەردى تارتپاق
بۇل جايىندا ءماجىلىس دەپۋتاتتارىنىڭ رەسمي ساۋالىنا جاۋاپ بەرگەن ق ر پرەمەر- ءمينيسترى اسقار مامين اتاپ ءوتتى، دەپ حابارلايدى قازاقپارات ءتىلشىسى.
«شەتەلدىك باپكەر مامانداردى تارتۋ - الەمدىك فۋتبولدا جالپى قابىلدانعان تاجىريبە. وسىعان بايلانىستى كاسىبي كلۋبتار ءۇشىن ىرىكتەۋ جۇمىسىن جۇرگىزۋ ماقساتىندا «وڭتۇستىك» (شىمكەنت) جانە «قايرات» (الماتى) فۋتبول اكادەميالارىندا يسپانيا مەن گەرمانيانىڭ شەتەلدىك باپكەرلەرى جۇمىس ىستەيدى. ودان بولەك، پرەمەر- ليگا مەن ءبىرىنشى ليگادا ونەر كورسەتەتىن وڭىرلىك كوماندالاردىڭ كوبى شەتەلدىك باپكەرلەر مەن مامانداردىڭ قىزمەتىن پايدالانادى»، - دەيدى ۇكىمەت باسشىسى.
بۇل رەتتە پرەمەر- مينيستر شەتەلدىك مامانداردىڭ كومەكشىلەرى وتاندىق باپكەرلەر ەكەنىن، ولار شەتەلدىك ارىپتەستەردىڭ تاجىريبەسىن الاتىنىن اتاپ وتكەن.
«كەلەشەكتە باپكەرلىك قىزمەت جاساۋعا ۋەفا ليتسەنزياسىن العان سوڭ ولار ءبىلىمى مەن تاجىريبەسىن وزدەرىنىڭ باپكەر رەتىندەگى جۇمىسىندا قولدانا الادى. سونداي- اق قازاقستاندىق جاستار اراسىنان فۋتبولدان ساپالى سپورتتىق رەزەرۆتى دايىنداۋ ءۇشىن مادەنيەت جانە سپورت مينيسترلىگى قازاقستاندىق فۋتبول فەدەراتسياسىمەن بىرلەسىپ ەكىنشى، ليگا كلۋبتارىندا وينايتىن جاس دۋبلەر فۋتبولشىلاردى دايىنداۋ ءۇشىن شەتەلدىك باپكەرلەردى تارتۋ ماسەلەسىن قاراۋدى جوسپارلاپ وتىر»، - دەيدى اسقار مامين.
ايتا كەتەيىك، وسى جىلدىڭ 23 - قاڭتارىندا ءماجىلىستىڭ ءبىر توپ دەپۋتاتى سول كەزدەگى پرەمەر- مينيستر باقىتجان ساعىنتايەۆتىڭ اتىنا رەسمي ساۋال جولداپ، وتاندىق كادرلاردى جانە قازاقستاندىق جاستار اراسىنان فۋتبولدان ساپالى سپورت رەزەرۆىن دايارلاۋ ماقساتىندا شەتەلدىك مامانداردى تارتۋ قاجەتتىگىن اتاپ وتكەن ەدى.
اۆتور: مارلان جيەمباي