باتىس قازاقستاندىقتار كورىسۋ كۇنىن كيەلى ورىندا اتاپ ءوتتى

ورال. قازاقپارات - باتىس قازاقستان جۇرتشىلىعى كورىسۋ كۇنىن سىرىم اۋدانى توعاناس اۋىلدىق وكرۋگىندە ورنالاسقان جۇماعازى حازىرەت - دادەم اتا مەكەنىندە اتاپ ءوتتى، دەپ حابارلايدى قازاقپارات ءتىلشىسى.

مۇندا ۇلتتىق سالت- ءداستۇردى جاڭعىرتۋ، ەل بىرلىگىن نىعايتۋ ماقساتىندا سوڭعى جىلدارى كورىسۋ كۇنىنە وراي «دادەم اتا - جۇماعازى حازىرەت» قوعامدىق قورىنىڭ (ءتوراعاسى عاريپوللا جانبوزوۆ) قولداۋىمەن مەرەكەلىك شارالار ۇدايى ۇيىمداستىرىلىپ كەلەدى.

بيىل دا كيەلى مەكەنگە حالىق جينالىپ، قىستان امان- ساۋ شىعىپ جاتقان اعايىن ءبىر- بىرىمەن قۇشاق جايىپ، قۋانا كورىستى.

 

باتىسقازاقستاندىق عالىم، تاريح عىلىمدارىنىڭ كانديداتى دامەتكەن سۇلەيمەنوۆا كورىسۋ كۇنىنىڭ شىعۋ تاريحىنا توقتالدى. مىسالى، 14 - ناۋرىز ەسكىشە جىل ساناۋ بويىنشا 1 - ناۋرىزعا كەلەدى. قازاق حالقىنىڭ ەجەلدەن تىنىس- تىرشىلىگى نەگىزىنەن مال شارۋاشىلىعىنا بايلانىستى بولعاندىقتان، التى اي قىستان امان شىعۋ ايرىقشا قۋانىش سانالعان. مال- جاننىڭ اماندىعىن ويلاعان ەل كوكتەمگە جەتكەندە، جادىراڭقى كوڭىلمەن قاۋىشقان. وكپە- رەنىشتەرى بولسا، كەشىرگەن.

 

شارانى ۇيىمداستىرۋشىلاردىڭ ءبىرى، «تەلەگەي» قوعامدىق بىرلەستىگىنىڭ ءتوراعاسى نۇرلان ءسادىر جىل بويى باسىنان كىسى ارىلمايتىن وسىناۋ كيەلى مەكەندى رۋحاني ورتالىققا اينالدىرعىلارى كەلەتىنىن جەتكىزدى.

 كورىسۋ كۇنى، ولكە شەجىرەسىنە وراي اڭگىمەلەر ايتىلىپ، بەلگىلى دومبىراشى ەدىگە نابيەۆ كۇي شەرتتى. ناۋرىزعا وراي تانىمال جىرشى فارحات ورازوۆ جىر- تەرمە ورىندادى.

 

 كوپبالالى وتباسىلارعا مەملەكەت تاراپىنان كورسەتىلەتىن كومەك- قولداۋ بويىنشا كەڭەس بەرىلىپ، سۇراقتارعا جاۋاپ قايتارىلدى.

 كورىسۋ كۇنىنە ارنالعان مەرەكەلىك شارالار ورال قالاسى مەن وبلىس اۋداندارىندا دا ۇيىمداستىرىلدى.