استانادا ناۋرىزدى جاڭا فورماتتا تويلاۋ باستالدى
«قازاقستان» كونسەرت زالىندا وتكەن « ۇلىستىڭ ۇلى كۇنى» اتتى مەرەكەلىك شاراسىندا تەاترلاندىرىلعان قويىلىم جانە ۇلتتىق ءداستۇر مەن ادەت- عۇرىپتار كورسەتىلىپ، سونداي- اق، ۇلتتىق سپورتتىق ويىندار ويناتىلدى.
سونىمەن قاتار، قازاق فولكلورىنىڭ ەرتەگى كەيىپكەرلەرى ەر توستىك، الدار كوسە، شىقبەرمەس شىعايباي جانە تازشا بالا مەرەكەلىك كەشتىڭ ءسانىن كەلتىردى.
ودان بولەك، ايتۋلى شاراعا ەلىمىزگە تانىمال ساحنا جۇلدىزدارى قاتىسىپ، ءوز ونەرلەرىن ورتاعا سالدى. ولاردىڭ قاتارىندا التىنبەك قورازبايەۆ، روزا رىمبايەۆا، جەڭىس سەيدۋللا ۇلى، جۇبانىش جەكسەن ۇلى، دوسىمجان تاڭاتاروۆ، قۇرماش ماحانوۆ، تورەعالي ءتورالى جانە تاعى باسقالار بار.
سول سياقتى كەش قوناقتارى ناۋرىز كوجەدەن اۋىز ءتيىپ، بالالارعا تاتتىلەر ۇلەستىرىلدى.
ايتا كەتسەك، ق ر مادەنيەت جانە سپورت ءمينيسترى ارىستانبەك مۇحامەدي ۇلى ءاز- ناۋرىزدى جاڭا فورماتتا تويلاۋدىڭ ۋاقىتى كەلگەنىن ايتقان بولاتىن.
«ەندى زامان تالابىنا ساي ناۋرىزدىڭ فورماتىن تۇبەگەيلى وزگەرتۋ قاجەت. ناۋرىزدىڭ ايرىقشا ءتالىم- تاربيە، قادىر- قاسيەت بەرەتىن تۇرلەرى وتە ەرەكشە. سوندىقتان، ناۋرىز مەيرامىنا جاڭا رەڭك بەرۋ ءۇشىن، ادامنىڭ ۇلتىنا، ءدىني باعىنىستىلىعىنا قاراماستان، ادامگەرشىلىك قۇندىلىقتارعا ءمان بەرە وتىرىپ، قازاقستان حالقى تۇگەل قامتىلاتىنداي مازمۇنىن جاساۋ كەرەك»، - دەدى ول.
اۆتور: داۋلەت ىزتىلەۋ