ديماش قۇدايبەرگەن ا ق ش-تا ءوتىپ جاتقان بايقاۋدان كەتىپ قالدى

استانا. قازاقپارات - ءانشى ديماش قۇدايبەرگەن امەريكاداعى «The World's Best» بايقاۋىنان كەتىپ قالدى، دەپ حابارلايدى قازاقپارات.

بۇل تۋرالى الەۋمەتتىك جەلىدە جاريالانعان ۆيدەودان بەلگىلى بولدى.

وندا ديماش بالالارمەن بىرگە سىنعا تۇسكىسى كەلمەيتىندىگىن ايتقان جانە قازىلار القاسىنان ءوزىن ءتۇسىنۋدى وتىنگەن.

«سىزدەردىڭ الدارىڭىزدا ونەر كورسەتۋ مەن ءۇشىن ۇلكەن باقىت ەكەنىن ايتا كەلىپ، بۇگىن ەكى بالاپانمەن بىرگە سايىسۋدان باس تارتۋ كەرەكپىن (...) سول سەبەپتەن سىزدەردىڭ رۇقساتتارىڭىزبەن بۇل سايىستىڭ تىزگىنىن كىشكەنتاي بۇلدىرشىندەرىمىزگە قالدىرعىم كەلىپ وتىر»، - دەدى ديماش.

ەسكە سالا كەتەيىك، ديماش قۇدايبەرگەن امەريكاداعى «The World's Best» بايقاۋىنىڭ فينال الدىنداعى شوۋىندا ءبىرىنشى بولىپ كەلە جاتقان ەدى.

قازاقستاندىق ءانشى «The World's Best» بايقاۋىنىڭ العاشقى تۋرلارىندا انسۇيەر قاۋىمنىڭ قۇلاعىنىڭ قۇرىشىن قاندىرعان كومپوزيتسيالار ورىنداپ، كوپشىلىكتىڭ كوڭىلىنەن شىقتى.